Акционерон æхсæнад «Осетия Полиграфсервис»-æн ис стыр ахадындзинад. Алывæрсыг куыст кæнынц æмæ сæ архайдæй рухс фенынц алыхуызон чингуытæ, газеттæ, периодикон журналтæ, брошюрæтæ… Сæйрагдæр та — æрвылбоны газеттæ мыхуыр кæнынц.
— Рæстæджы домæнтæн дзуапп дæтгæйæ, типографийы фæзындис нырыккон кусæнгæрзтæ, афтæмæй сæ конд продукцийы номхыгъд бирæ фæуæрæхдæр уыдзæн.
— Архайæм иумæйаг хъарутæй, цæмæй нæ конд чингуытæ, журналтæ æмæ газеттæ зæрдæмæдзæугæ уой адæмæн, иудадзыг кæсæм сæ хæрзхъæддзинадмæ, нæ куыст кæнæм æнæкъуылымпыйæ æмæ афойнадыл, — зæгъы куыстуаты директоры хæдивæг Хуыбаты Валя.
Æнгом æмæ куыстхъом коллективæн сæ фылдæр сты сылгоймæгтæ. Арæхстджынæй кусынц компьютерон хайады, мыхуыр æмæ хъæбæрцъар кæныны, стæй газетты цехты, сты дæсны дизайнертæ æмæ бухгалтертæ. Сæ æрмдзæф зæрдæмæдзæугæ кæй у, уымæ гæсгæ сæм заказтæ бирæ ис, суанг сыхаг регионтæй дæр. Пайда кæнынц алыхуызон ахорæнтæй, цæмæй продукци уа аивдæр, цæстуынгæдæр.
Дидинæгкалгæ уалдзæг 8 Мартъи алы сылгоймагæн дæр амондхæссæг уæд! Цардбæллонæй æрвитут уæ рæстæг!
Цæгæраты Жаннæ
