Республикæйы æвзарæн къамисы ацыд хатдзæгон пресс-конференци дзыллон информацийы фæрæзтæн. Архайдтой дзы РЦИ-Аланийы Сæргълæууæг Сергей Меняйло , республикæйы Парламенты Сæрдар Тускъаты Таймураз æмæ фæсарæйнаг цæстдарджытæ.
Мадзал байгом кодта Моргуаты Жаннæ. Æвзæрстытæн хатдзæгтæ скæныны официалон æмгъуыд у 28 мартъимæ. Республикæйы æвзарæн къамисы информацимæ гæсгæ, кæронбæттæн хатдзæгтæ скæндзысты абон къамисы æмбырды. Рагагъоммæйы бæрæггæнæнтæ та сты ахæм:
– Ирыстоны схъæлæс кодтой æвзарджыты 91,80 проценты.
Уыдонæй кандидаттæн сæ хъæлæстæ радтой:
– Владимир Путинæн – 89,01 проценты (450 мин адæймагæй фылдæр);
– Николай Харитоновæн – 5,10 проценты;
– Леонид Слуцкийæн – 3,50 проценты;
–Владислав Даванковæн – 1,70 проценты.
100 мин адæймаджы спайда кодтой хæдзары схъæлæс кæныны фадатæй.
–Уæрæсейы Президенты æвзæрстыты иумæйагæй архайдтой республикæйы Хицауады æмæ бынæттон хиуынаффæйады оргæнтæ, политикон партитæ, æвзарæн системæйы кусджытæ, барадхъахъхъæнæг оргæнтæ. Уыдон дзуапп лæвæрдтой æвзарæн хайæдты æдасдзинадыл, техникæйыл, къамисы уæнгтæ æмæ документтыл, стæй хæдзæрттæм æвзарджытæм цæуын куы хъуыд, уæд. Бæстæйы геополитикон уавæр хынцгæйæ, мах не ‘руагътам æнæзакъон цаутæ æвзарæн хайæдты, зынгсирвæзтытæ, эпидеми æмæ терроризмы фæзындтытæ, – загъта Моргуаты Жаннæ.
Фæстæдæр пресс-конференцимæ æрбацыдысты Сергей Меняйло æмæ Тускъаты Таймураз. Республикæйы Сæргълæууæг бузныг загъта фæсарæйнаг цæстдарджытæн, Уæрæсейы Президенты æвзарæн кампанийы кæй бакуыстой, уый тыххæй.
– Уæрæсейы Президенты æвзарæн кампани канд уæрæсейаг мадзал нæу, фæлæ ма йын ис дунеон стыр политикон ахадындзинад. Сымах уæхи цæстæй федтат, æвзæрстытæ Уæрæсейы закъоны бындурыл кæй ацыдысты, æмæ нæ рес-
публикæйы цæрджытæ барвæндонæй кæй загътой сæ фæндон, уый. Фыццаг бонæй дæр æмбæрстгонд уыд, адæмы кæй фæнды сæ конституцион бартæй спайда кæнын. Хъæуты æмæ горæтты дæр æвзарæн хайæдтæ уыдысты бæрæгбонхуыз, фæбæрæг кодта республикæйы разамонæг.
РЦИ-Аланийы Сæргълæууæг раарфæ кодта республикæйы æвзарæн къамисы кусджытæн, районты удуæлдайæ чи архайдта, уыдонæн, барадхъахъхъæнæг æмæ хицауадон оргæнтæн, æдасдзинадыл кæй бакуыстой, уый тыххæй.
– Æвзæрстыты бæрæггæнæнтæм гæсгæ, ноджыдæр иу хатт зæгъæн ис, Владимир Путиныл Уæрæсейы граждæнтæ кæй æууæндынц, уыимæ, нæ республикæйы æвзарджыты 90 процентæй фылдæр кæй радтой сæ хъæлæстæ ныры Президентæн. Уый ууыл дзуры, æмæ Владимир Путин у нæ бæстæйы национ фæтæг! – загъта Сергей Меняйло.
Æвзарæн кампани куыд ацыд, уый тыххæй сæ хъуыдытæ загътой фæсарæйнаг цæстдарджытæ дæр. Пакистайнаг 21-аздзыд Хамат Хан загъта, цалдæр бонмæ кæй федта æмæ базонгæ ис æвзарæн хайæдты
куыстимæ Дзæуджыхъæуы, æндæр цæрæн бынæтты, фенын сын кодтой Ирыстоны æрдз дæр, тынг йæ зæрдæмæ фæцыдысты нæ хæхтæ. Бæрзонд аргъ кæны æвзарæн кампанийæн, федта, æвзæрстытæ демократийы домæнтæм гæсгæ кæй цыдысты, уый.
Цæстдарджыты иумæйаг хъуыдымæ гæсгæ, Ирыстоны æвзæрстытæ ацыдысты бæрзонд æмвæзадыл, алы хайад дæр уыд æмбæлгæ домæнтæм гæсгæ ифтонггонд техникон фæрæзтæй, разыйæ баззадысты, æвзæрстыты бирæ фæсивæд æмæ сылгоймæгтæ кæй архайдта, уымæй.
Кæронбæттæны Моргуаты Жаннæ загъта, дæрддзæф хъæлæс кæнынæн нæ республикæйы кæй ис æппæт фæрæзтæ æмæ уавæртæ, æмæ дзы иннæ æвзарæн кампаниты рæстæг активондæрæй пайдагонд кæй
цæудзæн.
Мамиты Лолитæ
