Курчатоваг ахуырадон форумы бындурыл Дзæуджыхъæуы ацыд РЦИ-Аланийы Сæргълæууæджы Кубок райсыныл турнир æртæ наукæйæ: математикæ, информатикæ æмæ физикæйæ. Архайдтой дзы нæ республикæйы районты скъолаты дæс командæйы.
Турниры сæйраг нысан у, Цæгат Ирыстоны
ахуырдзау фæсивæдæй бæлвырд наукæты архайын кæй фæнды, математикæ, информатикæ æмæ физикæ сæхимæ кæй æлвасынц, уыцы сывæллæтты иртасæн æмæ сфæлдыстадон рæзтæн ахъаззаджы мадзæлттæ аразын. Уымæй уæлдай, конкурсы фæрцы сбæрæг уыдзысты, канд Цæгат Кавказы нæ, фæлæ æппæт бæстæйы технологон рæзтæн дæр ахъаз чи фæуыдзæн, уыцы курдиатджын специалисттæ.
Знон Дзæуджыхъæуы, центр «Вершина»-йы турниры регионалон фыццаг фæлтæры уæлахиздзаутæ хорзæхджын æрцыдысты нæ республикæйы Сæргълæууæджы Кубок æмæ æхцайы премитæй.
Бæрæгбоны архайдтой Сергей Меняйло, РЦИ-Аланийы ахуырад æмæ наукæйы министр Алыбегты Эллæ, Цæгат Ирыстоны уæлдæр скъолаты ректортæ æмæ ахуырдзаутæ.
Алыбегты Эллæ радзырдта турниры нысанты тыххæй, загъта, скъоладзаутæ бæрнонæй кæй акастысты конкурсы хæстæм, æмæ нæ республикæйы сывæллæттæ кæй æрбангом сты сæ иумæйаг хъуыддагмæ.
Сергей Меняйло дæр арфæтæ ракодта конкурсы архайджытæн æмæ загъта, нæ бæстæйы кæй нæ фаг кæны специалисттæ æмæ сæ агурынæн, цæттæ кæнынæн алы фадæттæ дæр арæзт кæй цæудзысты.
– Ацы турнир фыццаг у, æмæ фыццаг хатт алцы зæрдæйы фæндон нæ рауайы, фæлæ мæ ныфс ис, дарддæр хуыздæргæнгæ кæй цæудзæн, уымæй. Бацархайын хъæуы, цæмæй ацы конкурс канд республиконæй ма баззайа, фæлæ йæ райрæзын кæнын хъæуы, цæмæй дзы архайой нæ бæстæйы иннæ регионты сывæллæттæ дæр. Уый тыххæй та нын хорз бастдзинæдтæ ис МГУ, МГИМО æмæ Бауманы номыл институттимæ. Уыдоны фæзтыл архайынæн уын мах араздзыстæм æппæт фадæттæ дæр, канд математикæ, физикæ æмæ информатикæ нæ, фæлæ иннæ наукæты бæрзæндтæм схизыны хъуыддæгты дæр. Ирыстоны æппæт скъолаты дæр фæзындысты Курчатоваг æмæ «Рæзты тæлм»-ы, кълæстæ. Зонæм æй, кæй дзы нæ фаг кæны специалисттæ, фæлæ нæ республикæйы Ахуырады министрад бацархайдта, цæмæй уыцы кълæсты уемæ кусой институттæ æмæ университетты ахуыргæнджытæ, профессортæ. Рауагъдонмæ куы нæ уа технологон зонындзинæдтæ, уæд йæ дарддæры ахуыры фæндагыл цæлхдуртæ æвзæрдзæн. Æмæ уæ алчидæр ацы уавæр йæ зæрдыл дарæд. Алы фадæттæ æмæ уын гæнæнтæ дæр ис уæ ахуырадон рæзтæн, æмæ ахуыр кæнут, архайут, ныфсджынæй цæут уæ равзæрст дæсныйæдтæм, æмæ уæ къухы алцыдæр бафтдзæн, – загъта Сергей Меняйло.
Саутæты Тамилæ
