Радон пресс-конференцийы журналистты фарстытæн дзуапп лæвæрдтой РЦИ-Аланийы экономикон рæзты министры фыццаг хæдивæг Олег Быкадоров æмæ министры хæдивæг Туаты Георги.
– Экономикон рæзты министрады размæ бирæ нысантæ æвæрд ис, уыдонæй сæйрагдæр – нæ республикæйы социалон-экономикон хъомыс фæбæрзонддæр кæнын. Ныртæккæ куыст цæуы регионы райрæзты ног стратегийыл, фылдæр æргом здæхт уыдзæн экономикон æмæ социалон фарстатæм.
Фидаргонд æрцыдысты егъау инвестицион 54 проекты. Уыдонæй аст ныридæгæн царды уагъд цæуынц, сæ фæрцы фæзынд мин адæймагæн куысты бынæттæ, æфтиæгтæ æрбахастой 16,1 миллиард сомы. Иумæйагæй – проекттæй инвестицитæ æрбафтдзæн 89,1 миллиард сомы æмæ 8 мин куысты бынаты, – загъта Олег Быкадоров.
Уацхæсджыты фарстытæн дзуаппытæ дæтгæйæ, министры хæдивæг дзырдта куысты бæрæггæнæнтыл æмæ фидæны нысантыл. Министрад кæддæриддæр фæархайы бирæ форумты æмæ равдыстыты. Уыдонæй æппæты зындгонддæр форум «Россия» адард кодтой 8 июлы онг. Иумæйагæй архайд цæуы, цæмæй нæ равдыст аив æмæ зæрдæмæдзæугæ рауайа, ууыл.
Кавказы æмæ Бетъырбухы инвестицион форумты фæзуæтты цы проекттæ æвдыст æрцæудзысты, уый тыххæй та радзырдта Туаты Георги. Баст сты нæ республикæйы агропромышленнон къабазимæ, туризм æмæ логистикæимæ. Уыдонæй хицæн егъау проект у туристон комплекс «Мамысон».
– Ныридæгæн æнтыстджын куыст цæуы хъæрмуæтты арæзтады. Дзæуджыхъæумæ æрбацæуæны 60,2 гектары фæзуатыл æмбырд кæнынц, нырыккон технологитæй кæм пайда кæндзысты, ахæм комплекс. Йæ амидингæнджытæ куыд зæгъынц, афтæмæй проекты аргъ у 16 – 18 миллиард сомы.
Нырыккон дыргъцæхæрадæттæ «Казачий хутор» иу мин гектарыл æрзайын кодтой 25 мин тоннæйы фæткъуыйы тыллæг. Æмæ уый у, сæ хъаруты рæстæмбис. Дыууæ-æртæ азы фæстæ сæ тыллæг уыдзæн 50 мин тоннæйы æмæ йæ бафснайынæн куыстуаты кæрты сарæзтой уазалгæнæнтæ, æмæ фæткъуыйы 300 килограммы кæм цæуы, пластикæй ахæм къоппытæ аразæн цех.
Балергæсаджы куыст парахат кæны Ирыстоны. Уымæн нæм ис хорз æрдзон уавæртæ, сыгъдæг суадæттæ. Инвестицион проект «Остров Аквакультурæ»-йы аргъ у иу миллиард сомы. Наукæйы бындурыл кæндзысты кæсаджы куыст. Уымæй уæлдай ма, цы районы æрбынæттон сты, уым кæнынц социалон бирæ лæггæдтæ, – фæнысан кодта Туайы-фырт.
Дарддæр йæ ныхас уыд, Чмимæ хæстæг логистикон центр «Южные ворота»-йы арæзтадыл. Æрбынæттон уыдзæн æртæ гектары фæзуатыл. Ацы инвестицион проекттæ сты æнæмæнгхъæугæ, уымæн æмæ адæмæн пайда æмæ удæнцойдзинад хæссынц.
Лыггæнинаг фарстатæй иу у кадавардзинад. Нæ фаг кæны хъæугæ специалисттæ, уæлдайдæр та фæлтæрддзинад кæмæ ис, ахæмтæ. Уый тыххæй ведомствæ æмгуыстад кæны РЦИ-Аланийы
Ахуырад æмæ наукæйы
министрадимæ, стæй Адæмæн куысты бынæттæ дæттыны комитетимæ.
Пресс-конференцийы ма ныхас кодтой æндæр ахсджиаг фарстатыл дæр.
Цæгæраты Жаннæ
