Зынгæ, иттæг ахадгæ æмæ зæрдылдаринаг цау уыдис ивгъуыд цыппæрæмы Джызæлы хъæуы. Советон Цæдисы Хъæбатыр ДОЙАТЫ Давиды ном хæссæг бынæттон 2-æм астæуккаг скъоламæ æрбацыдысты
хъæубæсты цæрджытæ, æхсæнадон кусджытæ, фæсивæды минæвæрттæ.
Ам кадджын уавæры байгом кодтой, скъола раздæр азты каст чи фæци, фæстæдæр та, сæрмагонд æфсæддон операцийы архайгæйæ, йе ’взонг цард Фыдыбæстæйы сæраппонд чи радта, уыцы лæппуты номарæн фæйнæг. Уыдон уыдысты Харебаты Ильяйы фырт Азæмæт, Хуыбаты Альберты фырт Эльбрус, Хуриты Платоны фырт Рустам, Бедойты Отары фырт Сослан æмæ Хъаныхъуаты Виталийы фырт Владислав. Сæ лæгдзинад, æхсар æмæ хъæбатырдзинады фæдыл дзы алкæмæн дæр саккаг кодтой хæстон хæрзиуджытæ (мæлæты фæстæ).
Мадзал саразджытæ бæс-тон радзырдтой сæ алкæй тыххæй дæр, равдыстой сæрмагонд видеороликты фæрцы раздæры сабыр
рæстæджы сæ царды хабæрттæ, къамтæ, сæ хæстон æмбæлтты мысинæгтæ.
Хистæр кълæсты ахуыргæнинæгтæ аив æмæ зæрдæбынæй кастысты хæстон темæйыл æмдзæвгæтæ. Фембæлд амонæг, уырыссаг æвзаг æмæ литературæйы ахуыргæнæг Хæдзарæгаты Маргаритæ куыд загъта, афтæмæй Ирыстоны абоны фæсивæд дæр архайынц сæ лæгдзинад æмæ æхсарæй, Фыдыбæстæйы Стыр хæсты æнæмæлгæ сгуыхтдзинæдтæ чи ’вдыста, уыцы хистæрты фæзмыныл. Хæст æгъатыр у, æмæ та нæ Ирыстонмæ чысыл хъуаг цыппарыссæдз азы размæ куыд уыд, афтæ ныр дæр хъуысынц зæрдæриссæн уæззау хабæрттæ. Æмæ Хуыцауы бафæндæд, цæмæй ахæм хабæрттæ къаддæрæй-къаддæр кæной, уæлахизы рæстæг та тагъддæр куыд ралæууа.
Мадзалы кæронбæттæны Джызæлы хъæуы администрацийы сæргълæууæг Дойаты Таймураз зæрдиаг арфæ ракодта йæ саразджытæн, æрбацæуджытæн æмæ загъта, сæхи кæстæртæ сабыр дуджы куыд цæрой, æмæ хæст та тагъд
рæстæг куыд басабыр уа, тохы быдыры Фыдыбæс-тæйы сæрвæлтау йæ цард чи радта, уыдоны ном та æнустæм адæмы зæрдæты кæй баззайдзæн.
Номарæн фæйнæг байгом кæныны ма архайдтой Горæтгæрон районы администрацийы сæргълæууæджы хæдивæг Дзанæгаты Гуля æмæ районы ахуырады ха-йады сæргълæууæг Кокайты Бэлæ.
Хæмыцаты Морис
