Дзæуджыхъæуы æфсæддон госпитæль кæдæй кусы, ууыл рацыд 216 азы. Паддзах Александр II уынаффæйæ йын бындур æвæрд æрцыд XIX æнусы. Абон 412-æм æфсæддон госпитæлы цы бирæ адæм фыдæбон кæны, уыдонæн сæ куыст хуымæтæг нæу. Дзуапп дæттынц нæ Фыдыбæстæ хъахъхъæнджыты æнæниздзинадыл.
Хуыцаубоны ма бæрæг кæнæм Медицинон кусæджы профессион бон дæр. Уый фæдыл знон Афицерты хæдзары сарæзтой кадджын æмбырд. Залы æрбамбырд сты æфсæддонтæ, госпитæлы дохтыртæ, медицинон хотæ, æндæр кусджытæ. Урсхалатджынтæн арфæ ракæнынмæ æрбацыдысты кадджын уазджытæ дæр.
Æфсæддон оркестры цагъдимæ залмæ æрбахастой Уæрæсе æмæ Ирыстоны тырысатæ, паддзахадон гимнмæ хъуыстой лæугæйæ.
РЦИ-Аланийы Сæргълæууæджы номæй коллективæн зæрдиаг арфæ ракодта нæ республикæйы Хицауады Сæрдары хæдивæг Александр Реутов.
– Кæддæриддæр госпитæлы куыстой рынчынæн баххуысмæ цæттæ профессионалтæ. Рынчындоны истори хъæздыг у хъæбатырдзинад, хæрзаудындзинад æмæ уæлахизты дæнцæгтæй, – загъта А.Реутов.
Æфсæддон медицинæйы къабазы Дзæуджыхъæуы госпитæлæн цы стыр ахадындзинад ис, уый тыххæй дзырдта йæ разамонæг, медицинон службæйы булкъон Аркадий Смольников.
– Нæ рынчынтæн æхсызгон вæййы аудындзинад, æппæт бæстæ дыл тыхсы, æнхъæлмæ кæсы де сдзæбæхмæ, уый зонгæйæ, низтимæ тох кæнын æнцондæр у. Нæ сæртæй уын ныллæг кувæм, – загъта А.Смольников.
Æмбырды архайдтой Федерацийы Советы уæнгтæ Мамсыраты Таймураз, Дмитрий Корнилов, Клим Казаноков æмæ Виталий Назаренко.
– Стыр æхсызгонæй архайын абоны кадджын æмбырды. 216-аздзыд госпитæлы историйы сыфтæ афæлдахгæйæ, мах стæм сæрыстыр. Ивгъуыд азты фæлтæрты хорз хъуыддæгтæ дарддæр æнтыстджынæй хæссынц абоны медицинон кусджытæ. Раст фæзæгъынц, хæсты быдыры æфсæддонæн йæ хъысмæт ис командиры къухы, йæ æнæниздзинад, йæ цард та – дохтырты къухы. Зæрдæрухс ут уæ куыстæй, – загъта Мамсыраты Таймураз æмæ Уæрæсейы Советы Федерацийы Сæрдар Валентинæ Матвиенкойы арфæйы фыстæг радта æфсæддон госпитæлы сæргълæууæг Аркадий Смольниковæн (къамы).
Госпитæлы кусджытæй бирæтæ ныртæккæ архайынц сæрмагонд æфсæддон операцийы. Уыдонæн æмæ се ’мкусджытæн загътой арфæйы ныхæстæ æмæ сын радтой Кады гæххæттытæ.
ГУГКАТЫ Жаннæ,
къам систа
Татьянæ ШЕХОДАНОВА
