Уæрæсейы боны кадæн рæсугъд мадзæлттæ ацыдысты нæ бæстæйы алы рæтты. Кисловодскы ирæтты æхсæнадон организаци «Ирыстон-Алани» дæр зæрдиагæй бацархайдта, цæмæй ацы бон горæты цæрджытæ æмæ уазджытæн равдисой нæ национ культурæ æмæ æгъдæуттæ.
Бæрæгбоны æфсымæрон архайд бакодтой нæ республикæйæ хуынд делегацийы уæнгтæ дæр, этнографион къорд «Шатана» æмæ ансамбль «АРТАР», артисттæ Сечъынаты Элитæ æмæ Уалыты Альберт, æрмдæснытæ, суанг ма
куырд дæр.
РЦИ-Аланийы национ политикæ æмæ æддагон ахастдзинæдты министры хæдивæг Къуымæллæггаты Олег ацы мадзалы архайы дыккаг хатт æмæ куыд бафиппайдта, афтæмæй азæй-азмæ йæ æмвæзад бæрзонддæр кæны. Иннæ æхсæнæдты ‘хсæн тæккæ стырдæр делегаци æрцыд Ирыстонæй йе ‘мном æхсæнады фæдыл Кисловодскмæ. Уый ма бæрæг у, ирæтты æхсæнад «Ирыстон-Алани»-йы кæрт Стъараполы край æмæ горæты разамонджытæ æмхуызонæй кæй бабæрæг кодтой, уымæй. «Ирыстон-Алани»-йы бæрæгбон арæзт фæз дисы бафтыдта УФ-йы регионты ‘хсæн Нациты хъуыддæгты фæдыл федералон агентады минæвæртты дæр.
Министры хæдивæг сын раарфæ кодта республикæйы Сæргълæууæг Сергей Меняйлойы номæй, ирæтты æхсæнады куысты тыххæй. Йæ министрады Кадджын грамотæйæ схорзæхджын кодта æхсæнады разамонæг Хъыбызты Тимуры.
Ацы бæрæгбон уыд ирд æвдисæн ирæтты уазæг-уарзондзинадæн. Уæдæ куыд ис ахæм кадджын бæрæгбон уазджытыл æнæ æртæ чъирийæ сæмбæлын, зæгъгæ, æхсæнады уæнгтæ, хистæрæй кæстæрмæ æмхуызонæй архайдтой пецты уæлхъус, фæсивæд та цæттæ кодтой физонджытæ. Ирон бæгæныйæ, уæливыхтæ, цæхæраджынтæ æмæ картофджынтæй, ирон цыхтæй хорз федтой бæрæгбоны архайджытæ æмæ уазджыты. Фыдæлты æгъдаумæ гæсгæ, æртæ чъирийы æмæ бæгæныйы къусимæ «Шатана»-йы архайджытæ сæмбæлдысты бæрзонд уазджытыл дæр.
Бæрæгбон ахицæн стыр гала-концертæй. Уым сæ курдиат, сæ арæхстдзинад равдыстой куыд нæ делегацийы сфæлдыстадон уæнгтæ, афтæ æхсæнады национ кæфтыты ансамбль «Алания» дæр. Горæты мэр Евгений Моисеев бузныг загъта нæ республикæйы минæвæрттæн, æхсæнады уæнгтæн сæ сæрæн куысты тыххæй.
Кисловодск у бирæнацион горæт. Цы национ æхсæнæдтæ дзы ис, уыдоны ‘хсæн раппæлинаг у ирæтты æхсæнад «Ирыстон», ныр та – «Ирыстон-Алани». Равзæрд 1989 азы, æмæ йын æнгом æмæ хæлар ахаст-дзинæдтæ ис иннæ национ-культурон æхсæнæдтимæ. Зынгæ æвæрæн йæ куыстмæ сæ рæстæджы бахастой Хъайырты Нариман, Баскаты Петр, Гæбуаты Феликс æмæ Земфирæ, Баскаты Имбек, Мицъаты Алыксандр, Дзыгасты Зоя æмæ иннæтæ.
Бирæ азты Кисловодскы кусы национ кæфтыты ансамбль «Алания», йæ ра-замонæг – РЦИ-Аланийы культурæйы сгуыхт кусæг Танхълаты Маргаритæ. Кафынц дзы 17 адæмыхатты минæвары. Хъыбызты Тимур дæр йе ‘мцæдисонтимæ зæрдиагæй архайынц нæ национ удварны хæзнатæ, нæ фыдæлты æгъдæуттæ бахъахъхъæныныл. Ахæм куырыхон адæмты фæрцы Ирыстоны кадыл ноджы æфты.
МАМИАТЫ Лолитæ
