РЦИ-Аланийы Хицауады Сæрдар ДЗАНАЙТЫ Барисæн кусæг фембæлд уыдис Цæгат Кавказы хæххон-металлургон институты ректоры хæстæ рæстæгмæ æххæстгæнæг ХЪАМБОЛТЫ Дзамболатимæ. Сæ ныхас уыд студентон-арæзтадон къордты тыххæй. Æмбырды ма архайдтой республикæйы цæрæнуатон-коммуналон хæдзарады артаг æмæ энергетикæйы министр ТАМАТЫ Майрæн, компани «Россети»-йы цæгаткавказаг филиалы генералон директоры хæдивæг Виктор АБАИМОВ, республикæйы донуадзæн куыстуаты директоры фыццаг хæдивæг ХУЫГАТЫ Аслан æмæ иннæтæ.
Цæгат Кавказы хæххон-металлургон институт у Кавказы рагондæр æмæ кадджындæр ахуыргæнæндæттæй иу. Равзæрд 1931 азы. Уæдæй нырмæ цы дæсны специалисттæ цæттæ кæны, уыдон фæллой кæнынц нæ бæстæйы экономикæйы алы къабæзты. Уым цæттæ кæнынц хæххон къабазы кусджыты, металлургты, нефтяникты, электриктæ æмæ программистты, архитекторты, аразджыты, юристтæ æмæ экономистты, дизайнерты æмæ афтæ дарддæр.
Институты разамынд зæрдиагæй архайы, цæмæй практикон архайды рæстæг студенттæн фадат уа сæ зонындзинæдтæ æмæ сæ дæсныйад фæбæрзонддæр кæнынæн, фæлтæрддзинад райсынæн æмæ дарддæр куысты бынæттæ æнцондæрæй ссарынæн. Уый тыххæй ам сног кодтой, советон дуджы ахсджиаг чи уыд, уыцы студентон-арæзтадон къордты куыст. Ацы аз студентон-арæзтадон къордтыл æххæст кæны 65 азы. Ахæм юбилейы фæлгæты Дзанайты Барис æмæ Хъамболты Дзамболат бафыстой бадзырд сæ дарддæры архайд æмæ рæзты тыххæй.
Уазджытæн арфæ ракæнгæйæ, Хъамболты Дзамболат загъта:
– Абон нæ институты истори æмæ æнæхъæн Ирыстонæн дæр ахсджиаг бон у. Республикæйы Сæргълæууæг Сергей Меняйлойы бардзырдмæ гæсгæ абон фæзындзæн Республикон бирæвæрсыг студентон-арæзтадон къордты центр. Уый у тыхджын фæсивæдон организаци, студентты архайд бæрæг у нæ бæстæйы ахсджиагдæр куыстуæтты.
– Æхсызгон у, нæ республикæйы студентон-арæзтадон къордты архайд зæрдиагæй кæй цæуы, уый. Абон æрыгон дæсны специалисттæ, æнæмæнг, хъæуынц нæ бæстæйы бирæ куыстуæтты, – фæбæрæг кодта Дзанайты Барис.Ноджы ма ахæм бадзырдтæ Цæгат Кавказы хæххон-металлургон институты ректор бафыста нæ бæстæйы бирæ егъау куыстуæтты разамонджытимæ, цæмæй дзы студенттæ практикон куыст кæной æмæ фæлтæрддзинад исой, уый тыххæй.
ГÆБУАТЫ Галинæ,
къамтæ систа
Татьянæ ШЕХОДАНОВА
