Æхсæнадон транспорты лæггæдтæ банчы картæ «Мир»-ы фæрцы чи фиды, уыцы адæмæн хæстæгдæр мæйты дæргъы ис фæндаггаг 5 сомы къаддæр фидыны фадат. Уый тыххæй фехъусын кодтой РЦИ-Аланийы Транспорт æмæ фæндагон инфраструктурæйы комитеты.
Ахæм фæтк йæ тыхы уыдзæн 2024 азы 30 сентябры онг. Ирыстойнаг бæлццæттæ æмæ республикæйы уазджытæ, автомобилон æхсæнадон транспортыл цæугæйæ, æхсызгонæй райдыдтой ацы ногдзинадæй пайда кæнын. Абоны онг уал банчы терминалтæ ис 2 сæдæйы бæрц автобус æмæ трамвайы (уыимæ, архайд цæуы, цæмæй ахæм техникон фæрæзтæ æвæрд æрцæуой иннæ транспорты дæр).«Цæмæй балц асламдæр слæууа, уый тыххæй уæ фæндаггаг бафидут системæ «Мир»-ы картæйæ (уыимæ, картæтæ кæцы банчы райстат, уый уæлдай нæу, се ‘ппæтæй дæр ис спайда кæнæн). Афтæмæй алкæцы балцæй дæр фæстауæрц кæндзыстут 5 сомы. Мæ зæрдæ дарын, бæлццæттæ уыцы ногдзинадæй æхсызгонæй кæй пайда кæндзысты, ууыл», – республикæйы цæрджытæм йæ сидты бафиппайдта фиддонты системæ «Мир»-ы технологон æмæ нымæцон лæггæдты директор Мария Точилова.
Цæгат Ирыстоны Транспорт æмæ фæндагон инфраструктурæйы комитеты сæрдар Солиты Тариэлы ныхасмæ гæсгæ, республикæйы ныр дыккæгæм аз æххæстгонд цæуынц транспортон реформæйы мадзæлттæ. «Архайд цæуы маршрутон хызæджы нывыладыл, æлхæд цæуынц ног транспортон фæрæзтæ… Уыимæ, фарста афтæ æвæрд цæуы, цæмæй ног автобустæ æмæ трамвайтæ ифтонг уой электронон фиддоны валидатортæй. Ныфс мæ ис, ацы æмæ иннæ ногдзинæдты фæрцы бæлццæттæласæн лæггæдты хæрзхъæддзинад зынгæ кæй сырæздзæн, уымæй», – загъта комитеты сæрдар.
Æмæ ма ахæм нымæцтæ: ныртæккæ Цæгат Ирыстоны цæрджытæ пайда кæнынц фиддонты системæ «Мир»-ы 800 мин картæйæ.
КАЛМАНТЫ Аслан
