Дзæуджыхъæуы бынæттон хиуынаффæйады администрацийы разамынд Быгъуылты Дзæуæджы цыртдзæвæны раз фæзы цы стыр æмбырд сарæзта, уырдæм æрбахуыдтой горæтаг скъолаты хуыздæр рауагъдонты. Æвзонг лæппутæ æмæ чызджытæн астæуккаг ахуырады тыххæй аттестаттæ радта РЦИ-Аланийы Сæргълæууæг Сергей МЕНЯЙЛО.
Дзæуджыхъæуы ахуырады управленийы минæвары ныхасмæ гæсгæ, æнтыстджын ахуыры фæдыл сыгъзæрин майдантæ ацы аз райстой 208 рауагъдоны. Фæсивæды фæхуыдтой ацы фембæлдмæ æмæ сын сарæзтой бæрæгбон. Зындгонд зарæггæнджытæ æмæ артисттæ равдыстой концерт, скъолаты рауагъдонтæ та акафыдысты симд…
Сергей Меняйло, Цæгат Ирыстоны Парламенты Сæрдар Тускъаты Таймураз, Хицауады Сæрдары хæдивæг Платы Альбинæ, ахуырад æмæ наукæйы министр Алыбегты Эллæ, Дзæуджыхъæуы муниципалон сконды сæргълæууæг Александр Пациорин, горæты бынæттон хиуынаффæйады администрацийы сæргълæууæг Милдзыхты Вячеслав æмæ иннæ бæрнон кусджытæ фæсивæдæн ракодтой зæрдиагдæр арфæтæ, загътой сын сæ фæндиæгтæ.
— Абон сымах акъахдзæф кодтат царды уæрæх фæндæгтæм. Бæстæйы раззагдæр уæлдæр ахуыргæнæндæттæ сæ дуæрттæ сымахæн уæрæх байгом кодтой. Ныфс мæ ис, чи уæ цавæр дæсныйад равзæрста, уым æцæг дæсны специалист кæй суыдзæн. Уыимæ, мæ зæрдæ дарын, сымахæй бирæтæ фидæны профессион архайд нæ райгуырæн горæтимæ кæй сбæтдзыстут, ууыл дæр, — йæ арфæйы ныхасы бафиппайдта Милдзыхы-фырт.
Дзæуджыхъæуы администрацийы пресс-службæ
