Тæбæхсæуты Балойы номыл Ирон академион театры уыд нæ республикæйы адæмон поэт
КОКАЙТЫ Тотрадзы пьесæмæ гæсгæ æвæрд спектакль «Гæздæнтæ»-йы разпремьерон равдыст. Йæ режиссер-æвæрæг — театры аивадон разамонæг, РЦИ-Алани æмæ Кæсæг-Балхъары республикæты сгуыхт артист УАЛЫТЫ Гиви.
Спектакль фенынмæ театры уæрæх залмæ æрбамбырд сты ацы аивадон артдзæсты коллектив, нæ республикæйы сфæлдыстадон интеллигенцийы минæвæрттæ æмæ аивадуарзджытæ.
Спектаклы æвдыст цæуы дзуарыхъæуккаг Фыдыбæстæйы Стыр хæсты зынгхуыст авд хъæбатыр хæстоны цард тохы цæхæр æмæ хъæубæсты цæрджыты, стæй æфсымæрты мад Тъасо æмæ сæ фыд Асæхы удвидардзинадыл уыцы тугуарæн азты. Сæ ныфсхастдзинад æмæ фæразондзинад хъысмæты уæззау æмæ æвирхъау цæфтæн — сæ хъæбулты тыххæй хæсты быдырæй иу иннæйы фæдыл, сау гæххæттытæ исгæйæ. Уымæй уæлдай, драматург, режиссер æмæ актертæ бацархайдтой, ирондзинад, хистæр æмæ кæстæр фæлтæрты бастдзинад, сæ ахаст кæрæдзимæ алывæрсыг æмæ аивæй равдисыныл. Цард у мæлæтæй тыхджындæр, нæй йын бауромæн, рухс уæлахиз кæны цыфæндыйæ дæр хæрам æмæ мæлæтхæссæг тыхтыл. Уыцы равг æмæ хъуыды рахатæн уыд иумæйагæй, спектаклмæ кæсгæйæ, йæ фыццаг нывæй йæ фæстаг нывмæ.
Спектакль «Гæздæнтæ»-йы зæрдæагайгæ æнкъарæнджын сурæттæ сарæзтой нæ театры хистæр, астæуккаг æмæ кæстæр фæлтæры актертæ: РЦИ-Аланийы сгуыхт æмæ адæмон артисттæ Къуымæллæгкаты Валодя, Гæбуты Жаннæ, Сугъаты Хъазыбег, Мыртазты Тимур, Цæллагты Сослан, Дзанайты Эльбрус, Къæбысты Павел, Тыджыты Аслан, Черчесты Дианæ, артисттæ: Туаты Михал, Еналдыты Дмитри, Тедеты Сослан, Цугкиты Вероникæ, Косты Хъазыбег æмæ Ацæмæз. Адæмон сценæты хъазынц Ирон театры артисттæ æмæ сывæллæтты театралон студийы архайджытæ. Спектакль «Гæздæнтæ» музыкалон æгъдауæй сфæлгонц кодта Берозты Таймураз, нывгæнæг-сценограф Уалыты Ларисæ, кæфтытæ æвæрæг Сихъоты Тимур.
Спектакль «Гæздæнтæ»-йы премьерæ уыдзæн 18 июлы. Равдисдзысты йæ театралон фестиваль «Вахтангов. Возвращение домой»-йы саразджытæ, уазджытæ æмæ аивадуарзджытæн.
ГАСАНТЫ Валери
