Сывæллæтты æппæтуæрæсеон центр «Орленок»-ы хæстæгдæр рæстæг йæ куыст райдайдзæн сæрмагонд ахуырадон рад «ПРОтуризм. ПРОРоссию. ПРОисторию». Уыцы ахуырадон программæйы мадзæлтты архайдзысты Цæгат Ирыстоны æвзонг лæппутæ æмæ чызджытæ дæр.
Уый тыххæй фехъусын кодта РЦИ-Аланийы Ахуырад æмæ наукæйы министрады пресс-службæ.
Министрады минæвары ныхасмæ гæсгæ, нæ республикæйæн уыцы сменæмæ радих кодтой 10 балцæджы. Уыцы балцæгтæ саккаг кодтой, бæстæзонынад æмæ спортивон туризммæ æмхиц, æппæтуæрæсеон æмæ регионалон туристон-бæстæзонæн конференциты æнтыстджынæй чи архайы, уыцы 11-16-аздзыд фæсивæды хуыздæртæн.
Сæрмагонд ахуырадон рад «ПРОтуризм. ПРОРоссию. ПРОисторию»-йы мадзæлттæ Краснодары крайы Туапсейы районы (уым æрбынæттон центр «Орленок») цæудзысты 18 июлæй 7 августмæ. Фæсивæдæн денджызы был сæ фæллад суадзынæй уæлдай, уыдзæн туристон-бæстæзонæн архайды къабазы специалисттимæ фембæлыны, Уæрæсейы истори æмæ йæ адæмты кульурæйы ног æмæ цымыдисаг хабæрттæ базоныны фадат. Фæлтæрдджын инструктортæ сывæллæтты ахондзысты бæстæзонæн экскурситæм, амондзысты сын алфамбылай æрдзимæ æмархайды сусæгдзинæдтæ, экологон æдасдзинады домæнтæ…
Сывæллæтæн, кæй зæгъын æй хъæуы, скæндзысты алыхуызон бæстæзонæн-туристон ерыстæ дæр. Уыдон æмæ иннæ ахуырадон сесситы æнтыстджындæр архайджытæн саккаг кæндзысты сæрмагонд сертификаттæ.
КАЛМАНТЫ Аслан
