«Ахæм проекттæ фадат дæттынц хъæууон хæдзарады къабазы райрæзтæн амалхъомты ног фæлтæр бацæттæ кæнынæн», – ацы ныхæстимæ РЦИ-Аланийы Парламенты Сæрдар ТУСКЪАТЫ Таймураз дипломтæ радта Фермеры скъолайы фыццаг рауагъдонтæн. Ныр цалдæр мæйы зæхх æмæ фосдарынады куыстмæ йе ’ргом чи аздæхта, уыдон зонындзинæдтæ истой Хæххон паддзахадон аграрон университеты. Кадджын мадзалы архайдтой «Россельхозбанк»-ы цæгатирыстойнаг хайады разамонæг МЗОКТЫ Олег æмæ аграрон университеты ректор ГОГАТЫ Олег.
Фермерты скъолайы рауагъдонтæ иннæты ’хсæн хицæн кодтой сæ уæлæдарæсæй. Уыдысты хъæлдзæг, фæлæ, сæхимидæг мæт кæй кæнынц, уый сыл бæрæг уыдис. Цы зонындзинæдтæ райстой, уыдонæй куыд спайда кæн-дзысты, æхсæнадæн æмæ сæхицæн цы пайда æрхæсдзысты, уый равдисдзæн рæстæг.
– Аграрон университет, рæстæгимæ æмдзу кæнгæйæ, аразы ног мадзæлттæ хъæууон хæдзарадæн дæсны специалисттæ цæттæ кæнынæн. Бæркад зæхкусæджы къухæй цæуы, уымæ гæсгæ уæ куыст арфæйаг уыдзæн, – загъта Парламенты Сæрдар.
Ахуырадон æмæ практикон проект саразын къухы бафтыд «Россельхозбанк», аграрон университет, Хъæууон хæдзарады министрад æмæ нæ регионы стыр хъæууонхæдзарадон куыстуæтты иумæйаг архайдæй.
Теори æмæ практикон ахуырты рæстæг фидæны фермертимæ куыстой хуыздæр специалисттæ, эксперттæ, зонгæ сæ кодтой хи фермерон хæдзарады барадон æмæ финансон сусæгдзинæдтимæ. Ахуыры кæронмæ уыдонæй алчидæр бацæттæ кодта йæхи бизнес-проект.
Алы кар, алы дæсныйадыл хæст адæмы сиу кодта хъæууон хæдзарады куыстмæ тырнындзинад.
Уыцы бон аграрон университет бадзырдтæ бафыста цалдæр хъæууонхæдзарадон куыстуатимæ. Уыдон цæттæ сты студентты практикæмæ исынмæ.
«Россельхозбанк»-ы регионалон хайады разамонæг Мзокты Олег зæрдиаг арфæ ракодта ахуыргæнджытæн, сæ зонындзинæдтæ æнæвгъауæй кæй лæвæрдтой ахуырдзаутæн, уый тыххæй æмæ фехъусын кодта æнæнхъæлæджы æхсызгон хабар. Фермерты скъолайы алы рауагъдонæн дæр лæвар кæнынц банчы номон картæ, нывгонд ыл ис аграрон университеты бæстыхæйттæй иу.
Æртæ мæйы ахуыртæ, стæй теори æмæ практикæйы 250 сахаты фæстейы аззадысты. Профессионалон ахуырады тыххæй паддзахадон дипломтимæ ныр алкæмæндæр ныфсджынæй йæ бон у агропромышленнон комплексы уарзон куыст кæнын. Гогаты Олег зæрдиаг арфæ ракодта, ацы ахсджиаг хъуыддагмæ йæ æвæрæн чи бахаста, уыдонæн, республикæйы Хицауад æмæ Парламентæн, æппæт ахуыргæнджытæн, РЦИ-Аланийы Хъæууон хæ-
дзарад æмæ Экономикæйы министрадтæн, республикæйы кæсагдарджыты ассоциаци æмæ иннæтæн. Фæстæдæр Гогаты Олег
хуыздæр рауагъдонтæн балæвар кодта сертификаттæ.
Университеты дыргъты питомникæй Годызты Зæлинæ, Абайты Иринæ, Заремæ Шварцман æмæ Хъайтмазты Таймуразæн ратдзысты дыргъбæлæсты талатæ.
Бæрæгбоны архайджытæ сæ арæхстдзинад равдыстой ирон кафтæй, хъисын фæндырæй цæгъдынæй.
Фермерты скъола равдыста йæ ахадындзинад, уымæ гæсгæ ног ахуыры аз æнхъæлмæ кæсы курдиатджын, хъæппæрисджын, фæллой æмæ ахуыр кæнынмæ зивæг чи нæ кæны, ахæмтæм.
ГУГКАТЫ Жаннæ
