Ацы бонты Цæцæны сæйраг горæт Грознайы Кавказы цы инвестицион форум цæуы, уый хъуыддаджы программæйы фæлгæты РЦИ-Аланийы Сæргълæууæг Сергей МЕНЯЙЛО архайдта, Цæгат Кавказы регионтæм фылдæр инвестицитæ æрбаздахыны фарстатæм кæм æркастысты, уыцы сессийы.
Фембæлды архайдтой æмæ зæрдиаг ныхас кодтой регионтæ æмæ рæзты институтты разамонджытæ æмæ бизнесы минæвæрттæ. Цы фарстатыл дзырдтой, уыдоны ‘хсæн – паддзахадон æххуысы ног хуызтæ, рæзтæн хъæугæ фæрæзтæ, инвестицион климæт саразыны ахадгæ мадзæлттæ.
Сессийы ма архайдтой Уæрæсейы Федерацийы экономикон рæзты министры хæдивæг Сергей Назаров, «Кавказ.УФ»-йы генералон директор Андрей Юмшанов, Чысыл æмæ рæстæмбис амалхъомады рæзты федералон корпорацийы генералон директор Александр Исаевич, Сбербанчы хуссар-ныгуылæн дæлхайады сæрдар Анатолий Песенников, «Cosmos hotel group»-ы президент Александр Биба, уæрæсейаг амалхъом, компьютерон техникæ «Бештау», зæгъгæ, ахæм брендимæ аразæг компанийы разамонæг Владимир Кузнецов.
Сергей Назаров, фембæлд байгом кæнгæйæ, фæбæрæг кодта инвестицион форумтæ аразыны ахадындзинад амалхъомтæ æрбаздахыны тыххæй. Уый бафиппайдта, Цæгат Кавказы экономикæйы ахъаззаг къабæзты рæзтæн стыр гæнæнтæ кæй ис, æмæ дзы арæхстджынæй спайда кæнын кæй хъæуы.
– Регионтæм стыр банкты цымыдисдзинад рæзы. Ууыл дзурæг у, кредитон продуктты нымæц кæй фылдæр кæны, уый. Дарддæр дæр æнæмæнг хъæуы инфраструктурон арæнæвæрдты сæрты хизын, бизнесмæ сæрæндæрæй раздахынæн, рæзты институтты фæрæзтæй пайда кæнгæйæ. Æмæ ам фæбæрæг кæнын хъæуы консалтинджы вазыгджындзинад æмæ регионы инвестицион гæнæнтæм бизнес æмæ банктæм цымыдисдзинад сæвзæрын кæнын, – загъта Сергей Назаров.
Сергей Меняйло бафиппайдта, абон тынг ахсджиаг кæй у бизнесæн æмбæлгæ уавæртæ саразын. Инвестортæ сæ фæрæзтæ бавæрынмæ кæм хъавынц, уыцы регионы, фыццаджыдæр, хъуамæ уа æдас.
– Абон Цæгат Кавказы республикæты экономикон сæйрагдæр къабæзты рæзтæн ис æппæт фадæттæ дæр. Уыдон сты туризм, хъæууон хæдзарад, промышленность. Уый тыххæй нæм ис, куыд регионалон, афтæ федералон æххуысы мадзæлттæ дæр. Фæлæ уæддæр бизнес, «даргъ æмæ аслам» æхцатæ кæм ис, администрацион гæрæнтæ бындæр кæм сты, æрмæст уырдæм нæ тырны. Бизнес, фыццаджыдæр, агуры æдасдзинад. Йæхи хорз куы æнкъара, куы ницæмæй тæрса, уæд йæ фæрæзтæ дæр хъуыддагæн нæ бавгъау кæндзæн. Уымæ гæсгæ, æнæмæнг, мах архайын хъæуы, цæмæй Цæгат Кавказ базоной куыд зæрдæхæлар, сабыр, цæстуарзон, прог-
рессивон регион. Цæгат Ирыстон дарддæр дæр пайда кæндзæн æппæт мадзæлттæй инвестицион климæт фæхуыздæр кæныныл æмæ инвестортæн хъæугæ уавæртæ аразыныл, – фидарæй загъта республикæйы Сæргълæууæг.
Кавказы инвестицион форум арæзт цæуы Уæрæсейы Федерацийы Президент Владимир Путины Указмæ гæсгæ. Æрвылазон кæй у, уый ахъаз у Цæгат Кавказы инвестицион гæнæнтæ фæхъомысджындæр кæнынæн йæ æнæрлæугæ социалон-экономикон рæзтæн. Кавказы инвестицион форум аразæг у фонд «Росконгресс» Уæрæсейы Федерацийы Экономикон рæзты министрады æххуысæй.
16 июлы та Цæгат Ирыстоны стендмæ æркастысты Уæрæсейы Федерацийы Хицауады Сæрдар Михаил Мишустин æмæ Республикæ Узбекистаны премьер-министр Абдулла Арипов Кавказы инвестицион форумы.
Уазджытыл æхсызгонæй сæмбæлд РЦИ-Аланийы Сæргълæууæг Сергей Меняйло. Республикæйы разамонæг сын радзырдта, экспозицийы æвæрд чи ис, регионы уыцы сæйраг æнтыстдзинæдты, стæй фидæны пълæнтты тыххæй.
Сергей Меняйло фæбæрæг кодта, стенды сæйраг хъуыды Цæгат Ирыстоны инвестицион гæнæнты райрæзт бавдисын кæй у, æмæ бузныг загъта Уæрæсейы Хицауадæн, субъектæн иудадзыг ахадгæ æххуыс кæй кæны, уый тыххæй.
Цæгат Ирыстоны разамонæг Михаил Мишустинæн радзырдта, республикæ фермертæм, бынæттон продукциуадзджытæм йæ хъус кæй дары, алывæрсыг æххуыс сын кæй дæтты.
Уæрæсейы Хицауады Сæрдар Михаил Мишустин разыйæ баззад æмæ бæрзонд аргъ скодта, Цæгат Ирыстон йæхи равдыстмæ куыд бацæттæ кодта, уымæн.
ГАПБАТЫ Алетæ
