Алагиры фæндзæм астæуккаг скъола йæ дуæрттæ куы бакодта, уæдæй нырмæ æнусы ’рдæг рацыд. Федералон программæ «Ахуырады рæзт»-ы фæлгæты 2020 азы скъола бындуронæй цалцæггонд æрцыд. Уæд баивтой доны æмæ хъармгæнæн системæтæ, электрон тыхы телтæ, бæстыхайы пъолтæ, дуæрттæ, рудзгуытæ. Скъоладзаутæ ахуыр кæнынц сыгъдæг æмæ райдзаст кълæсты.
Æмæ кæд мидæгæй цалцæг æрцыд, уæд йæ æддаг бакаст та бынтон зæрдæмæдзæугæ нæ уыд. Ныртæккæ аразджытæ кусынц скъолайы цыппар бæстыхайы дæр барæсугъд кæныныл. Майы чи райдыдта, уыцы куыстыты иу хай фæцис. Сæ уындæй зæрдæ райы. Пайда кæнынц нырыккон хæрзхъæд керамогранитæй. Йæ гæнæнтæм гæсгæ дæтты хъармдзинад, хъахъхъæны дымгæтæй, уымæй уæлдай, у фидар. Бирæ азты йæ хуыз нæ сивдзæнис.
Æдæппæтæй ног къулты фæзуат уыдзæн цыппар мин квадратон метры бæрц. Керамогранит æвæргæйæ, уыцы иу рæстæг лæгъз кæнынц рудзгуыты алывæрстæ, æддæрдыгæй дзы цы асинтæ ис, уыдон цалцæг кæнынц.
Скъолайы сæйраг агъуыстæн йæ бацæуæнтæ дæр композитон æрмæгæй арæзт куы æрцæуой, уæд суыдзæн ноджы аивдæр æмæ æнцонвадатдæр. Домæнтæм гæсгæ дзы уыдзæнис лифт, йе ’нæниздзинад хъыгдард кæмæн у, уыцы сабитæн.
Цæмæй ног ахуыры азы райдианмæ скъола бацæттæ уа, уый тыххæй дзы æрвылбон кусы 20 адæймаджы бæрц. Боныцъæхтæй суанг изæрдалынгтæм хæдзардзинæй архайынц.
Нæ уацхæссæг
