Ӕвдӕм ӕппӕтдунеон фестиваль-конкурс «Ирон бӕгӕны-2024»-ӕн ивгъуыд къуырийы кӕрон скодтой хатдзӕгтӕ. Мадзал ацыд туристон базӕ «Альпина парк»-ы. Архайдтой дзы дӕсны бӕгӕныфыцджытӕ Франц ӕмӕ Туркӕй, Бельгийӕ, Хуссар Ирыстонӕй, стӕй Цӕгат Ирыстоны ӕппӕт районтӕй. Хуыздӕр бӕгӕны чи сфыхта, уый бӕрӕг кодтой бӕгӕныфыцӕн компани «Бавари»-йы минӕвӕрттӕ. Фыццаг бынат бацахста МӕРГЪИТЫ Уарзетӕ Кировы районы Комсомольскы хъӕуӕй, дыккагмӕ рацыд ӕрыдоны районы Фыййаджыбылы хъӕуккаг ПЛИТЫ Фатимӕ, ӕртыккаг бынат ӕрхауд Горӕтгӕрон районы ногираг ТЫБЫЛТЫ Еленӕмӕ.
Йӕ расидынӕй фӕстӕмӕ хуыздӕр ирон бӕгӕныфыцӕг сбӕрӕг кӕныны конкурсы архайы фыййаджыбылаг хӕдзары ‘фсин Плиты Фатимӕ. Уӕвгӕ та республикӕйы ӕппӕтдунеон конкурс ацыд ныр ӕвдӕм хатт. Районты ӕмвӕзадыл ацы хатт сси фыццаг, кӕронбӕттӕны та йын саккаг кодтой дыккаг бынат.
— Ме ‘фсин Елычкӕйӕ мын баззадысты бӕгӕны фыцыны сусӕгдзинӕдтӕ, хорз бӕгӕны фыхта. Уӕвгӕ, уыцы фӕлтӕрӕй йӕ фыцынмӕ чи нӕ арӕхст, ахӕм сылгоймӕгтӕ ссарӕн нӕ уыд Фыййаджыбылы. Дзуарыхъӕуккаг дӕн мӕхӕдӕг, Чъерджиаты чызг. Хӕрз ӕрыгонӕй ӕрцыдтӕн Плиты бинонтӕм. Мӕ мадӕн-иу ӕххуыс кодтон бӕрӕгбӕттӕм бӕгӕны фыцгӕйӕ, фӕлӕ йын уӕд йӕ мидисыл никуы ахъуыды кодтон. Хорз бӕгӕны сфыцыныл бирӕ тухӕн ис, йӕ сусӕгдзинӕдтӕ йын куы зонай, уӕд дӕ фыдӕбон нӕ фӕдзӕгъӕл уыдзӕн. Дон — сыгъдӕг ӕмӕ хӕрзад, зад — бӕркадджын, уӕнгтӕн тыхдӕттӕг, хуымӕллӕг — йӕ афоныл тынд ӕмӕ хӕрздӕф. Суанг ын йӕ фыцыны ӕмгъуыд дӕр хъуамӕ зонай, ӕртӕ уылынджы хъуамӕ ныффыца аджы, зӕгъгӕ-иу мын амыдта Елычкӕ. Ныр дӕр ма нӕм сты, бӕгӕны фыцгӕйӕ-иу цы хӕдзары дзауматӕй архайдта, уыдон. ӕппӕт хъацӕнтӕ дӕр — мӕхи къухтӕй рацӕуынц. Хуыздӕр лӕвар та — чи йӕ фӕнуазы, уый зӕрдӕ йӕ куы айсы, уӕд уый вӕййы.
Ӕвдӕм хатт архайдтон «Бавари»-йы расидт конкурсы, йӕ саразджытӕ зӕрдиагӕй бацархайынц, цӕмӕй ирон бӕгӕныйы бӕрӕгбон нывыл уагыл ацӕуа. ӕнхъӕл нӕ уыдтӕн, районы мӕм фыццаг бынат ӕрхаудзӕн, уый. Кӕронбӕттӕны дыккаг кӕй сдӕн, уый дӕр мын ӕнӕнхъӕлӕджы уыд. Ахсджиаг та ма уый дӕр у, ӕмӕ фестиваль-конкурсы хӕрӕмттӕ кӕй нӕ кӕнынц жюрийы уӕнгтӕ. ӕппӕт дӕр вӕййы нывыл уагыл. Ацы хатт дӕр та афтӕ рауад, — зӕгъы Фатимӕ.
Ирон хӕринӕгтӕ куыд хъӕздыг, алыхуызон ӕмӕ бӕркадджын сты, уый фенӕн вӕййы конкурсы рӕстӕг. Фынгтӕ сӕ фӕтасынц. Дзыкка, къӕлуа, цӕкуытӕ, насджын, хъӕдурджын, картофджын, задын, ӕмыс, нартхоры кӕрдзынтӕ, суанг цӕхӕры фых нартхӕрттӕ ӕмӕ картӕфтӕ дӕр равӕрынц фынгыл. Ӕмӕ, кӕй зӕгъын ӕй хъӕуы, ӕртӕ чъирийы ӕмӕ уӕхстыл физонӕг. Фестивалы ацы хайы дӕр сбӕрӕг сты фӕуӕлахизуӕвджытӕ, хуыздӕр фынгӕвӕрд рауад ӕрыдоны районӕн, бӕркадкъух фыййаджыбылаг ӕфсинтӕ йӕ рахастой жюрийы размӕ, хуртуаны раз, ӕмӕ се ссыны инсценировкӕйы архайдтой Гайттаты ӕмӕ Гутнаты бинонты кӕстӕртӕ. Турчы цӕрӕг ирон сылгоймаг Хъуысаты Мелекы фынгӕвӕрд фӕцыд жюрийы зӕрдӕмӕ, ӕмӕ йын конкурсы саккаг кодтой дыккаг бынат, дзагарм Джиголаты Заремӕйы фынгӕвӕрд та рацыд ӕртыккаг бынатмӕ, цӕры Цхинвалы. Уӕлахиздзаутӕ хорзӕхджын ӕрцыдысты конкурс-фестивалы дипломтӕ ӕмӕ ‘хцайӕ. Конкурс-фестивалӕн ис ирон цардыуаг, алы кары ӕмӕ адӕмыхӕттытӕ иу кӕныны нысан. Уый уӕлдай ахсджиаг у ныры царды, цӕугӕ та акодта йӕ расидӕг компани «Бавари»-йы равзӕрды юбилейон азы кадӕн.
ХУЫБИАТЫ Ларисӕ
