Республикӕйы Хицауады Сӕрдар ДЗАНАЙТЫ Барис цы ӕмбырд скодта, уым ӕркастысты ӕмӕ равзӕрстой Национ музей ӕмӕ йӕ филиалты рӕзты фарстатӕ.
Ныхасы архайдтой Национ музейы, йӕ филиалты разамонджытӕ, ӕххӕстгӕнӕг хицаудзинады бӕрнон кусджытӕ. РЦИ-Аланийы Национ музейы архайды тыххӕй раныхас кодта йӕ разамонӕг Цуциты Аслан. Йӕ хатдзӕгмӕ гӕсгӕ, музейты кадыл ӕфты, цӕрджыты фӕнды зонын нӕ рагфыдӕлты бынтӕ ӕмӕ культурӕ. Фарон уыцы нысанимӕ Национ музеймӕ ӕрбацыд 110 мин адӕймагӕй фылдӕр. Ацы азы райдайӕнӕй та — 120 мин адӕймаджы.
Фарон дзы равӕрдтой 80 фылдӕр равдыстон проекты, нырмӕ сты 50. Республикӕйы культурӕйы кусӕндӕттӕ баиу кодтой «Пушкинаг картӕ»-мӕ, музей скӕны культурон-ахуырадон хъуыддӕгтӕ. Ацы аз музей райста федералон субсиди 25 милуан сомы, уыдонӕй сфӕлгонц кодтой музейы филиалтӕ хъӕугӕ ифтонггӕрзтӕй. Цуциты Асланы ныхӕстӕм гӕсгӕ, хъуамӕ тагъд балхӕной интерактивон ифтонггӕрзтӕ, стеллажтӕ, витринӕтӕ, нырыккон хъӕдын дзаума, рухсдӕттӕг фӕрӕзтӕ.
Дзанайты Барис куыд фӕбӕрӕг кодта, афтӕмӕй ӕппӕт музейтӕ дӕр хъуамӕ кусой ӕмӕ рӕзой, нӕ адӕм ӕмӕ туристтӕн уой хъӕугӕ, ахсджиаг. Нырыккон сервистыл дзургӕйӕ, Дзанайы-фырт куыд загъта, афтӕмӕй уый у музейты рӕзты сӕйраг рахӕцӕн. «Республикӕмӕ ныртӕккӕ тынг бирӕ туристтӕ ӕрбацӕуы, бафӕнды сӕ нӕ культурӕимӕ, историимӕ, традицитимӕ базонгӕ уӕвын. Хъуамӕ конструкци афтӕ саразӕм ӕмӕ Национ музеймӕ, йӕ филиалтӕм бацӕугӕйӕ, нӕ уазджытӕ ӕмӕ цӕрджытӕ информаци райсынӕй уӕлдай, банкъарой удӕнцойдзинад дӕр. Ома, ӕхца ма бафидгӕйӕ, картӕйӕ спайда кӕнын. Уыдӕттӕ цӕмӕй сӕ бынат ссарой, уымӕн республикӕйы Хицауад фадӕттӕ кӕны», — фӕбӕрӕг кодта Дзанайты Барис.
РЦИ-Аланийы Сӕргълӕууӕг ӕмӕ Хицауады пресс-службӕ
