Цæстфæлдахджыты сайæн митæй хи бахъахъхъæныныл ныхас цыди æнахъом фæсивæдимæ куысты Рахизфарсы районы хайады инспектор Самты Софияйæн Цæгат Ирыстоны Беслæны паддзахадон базарадон-экономикон колледжы хайады ахуырдзаутимæ.
София сын бæстон радзырдта, цæстфæлдахджытæ æрыгæтты сайынæн арæхдæр цавæр мадзæлттæй пайда кæнынц, уый тыххæй, стæй загъта, цæмæй æнæзонгæ адæймæгтимæ æгæр бирæ ма ныхас кæной социалон хызты. Уыдон дæ, гæнæн ис, æмæ схоной сæ хорз зонгæ, хæлар æмæ дæ курдзысты æхца алыхуызон æфсæнттæй: æвæстиатæй операцийæ райдай æмæ ахсджиаг лæггæдтæн хæрдзтæй фæу. Кæнæ ныффыссынц хъусынгæнинаг æнцонæй бирæ æхца бакусыны тыххæй йе та феххуысы фæрæзтæ пайдайаг хъуыддаджы бахæссынæн.
Пъæлицæйы кусджытæ æмбарын кæнынц адæмæн уыцы хабæрттæ, фæлæ уæддæр цæстфæлдахджытæ сæ митæ нæ уадзынц, агурынц ног мадзæлттæ адæймаджы асайынæн. Инспектор Самты Софияйы ныхасмæ гæсгæ, хъæуы, куыддæр фæдызæрдыг уай, афтæ фехгæнын дæ бастдзинад телефоны кæнæ Интернеты æмæ макæдæм æрвитын æхцайы фæрæзтæ.
Фембæлды кæрон инспектор байуæрста студенттæн сæрмагонд гыццыл брошюрæтæ «Куыд ис цæстфæлдахджыты ныхмæ лæууæн».
РЦИ-Аланийы
Мидхъуыддæгты
министрады
пресс-службæ
