Нæ фыдæлтæ-иу афтæ дзырдтой, къодах, дам, йæ фыццаг цæфæй бæрæг вæййы. Уымæн бирæ цæвиттонтæ æрхæссæн ис. Мæн та фæнды Елхоты цæрæг Жигунов Зауырбеджы тыххæй радзурын. Кæд æмæ кæсгон лæппу у, уæддæр схъомыл Дзгойты фæрнæйдзаг хæдзары.
Йæ удмæ хæстæг райста ирон æгъдау, æфсарм, нæ æнæмæлгæ традицитæ. Дзгойты хистæртæ-иу афтæ загътой, нæ хæрæфырт Зауырбегæй рауайдзæн æцæг арфæйаг ирон лæг. Æмæ уый царды бантыст Жигуновы къухы. Раст рæвдауæндонæй райдай, скъолайы азтæй фæу, йæ зонд, йæ арæхстдзинад алцæуыл дæр æххæссыдысты. Уæд ма ГТО-йыл дæр ахуырдзаутæ æнувыд уыдысты, Зауырбег дæр равдыста куыст æмæ Райгуырæн бæстæ хъахъхъæнынмæ цæттæдзинад.
Уæдмæ йæм фæсидтысты æфсадмæ, æртæ азы дзы стыр кадимæ баслужбæ кодта, уæдæ йæ бæллиц дæр сæххæст, райста шофыры дæсныйады æвдисæндар. Æфсады устав æмæ домæнтæ кадимæ, сæрæнæй кæй æххæст кодта, уымæн æвдисæн у йæ æфсæддон разамонæджы арфæйы фыстæг Елхотмæ. Хæдзармæ сыздæхгæйæ, Зауырбег райдыдта кусын шофырæй, æхсæнады цардмæ æвдыста стыр æргом. Равзæрстой йæ Елхоты хъæуы советы депутатæй.
Зауырбег æвзарджытимæ кæддæриддæр æнгом баст уыд, се ‘ппæт фарстатæ дæр сын уайтагъд лыг кодта. Елхот стыр хъæу у, сыгъдæгдзинады зиутæ скæнын дзы ба-
хъæуы. Адæммæ фæдзур, уæд рацæуынц, æмхуызонæй бавналынц, алфамбылайтæ ныссыгъдæг кæнынц. Хъæуы цæрджытæ сты диныл хæст адæм, иутæ сæ куывд бахæссынц мæзджытмæ, хъæуы кæрон аргъуанмæ дæр кувæг адæм цæуынц. Цæрджытæ хорз зонынц Зауырбеджы, хонынц æй адæмæн лæггадгæнæг.
Йæ бон у дзуапп райсын, тыхстаг фарстатæ рæгъмæ рахæссын. Йæ цардæмбал Дзуонимæ схъомыл кодтой фырыхъулы хуызæн лæппу. Елхоты цæрджытæ сæ цæст æрæвæрдтой Зауырбеджы архайдыл æмæ йæ равзæрстой хъæуы Ныхасы сæрдарæй. Кæд æмæ йæ бæрнон хæстæ фæфылдæр сты, уæддæр алы хъуыддаг дæр банывыл кæныныл архайы.
Нæ районы сæргълæууæг Нæкуысаты Барис дæр разы у Зауырбеджы куыс-
тæй, æхсæнадмæ йæм цы ахаст ис, уымæй. Зауырбегæн фидар бастдзинæдтæ ис хъæуы разамындимæ, иумæ архайынц вазыгджын хъуыддæгтыл. Хъæуы уынгтæ сты асфальтæй æхгæд, Терчы былгæрæттæ сыгъдæг, цæхæр калынц скъола æмæ рæвдауæндæтты кæртытæ, æфсæнвæндаджы станцæйæн дæр йæ бакаст фæаивдæр.
Зауырбег куыд зæгъы, афтæмæй хъæубæстæ, зианы хъуыддæгтæ кæнгæйæ, йæхи æвдисы уæздандæрæй. Мæрдæхсæвæр нæм нал кæнынц, саударджытæ сæ риутыл зианы къамтæ нал дарынц. Куыд фæбæрæг кодта Зауырбег, афтæмæй ма ис, бакусын цæуыл хъæуы, ахæм хъуыддæгтæ, фæлæ уыдон дæр сабыргай нæ цардæй схицæн уыдзысты.
Кæд æмæ ныхас Зауырбеджы æхсæнадон куыстыл цæуы, уæд исчи зæгъдзæн, цымæ йæхæдæг кусгæ нал кæны. Кусы нæ районы газет «Размæ»-йы шофырæй. Йæ хæдтулгæ машинæ кæддæриддæр цæттæ вæййы фæндагмæ рацæуынмæ. Уацхæсджыты уайтагъд фæхæццæ кæны æрмæг æмбырд кæнынмæ, газеты редактор Милдзыхты Анжелæ дзы разы у.
Зауырбег, ирон лæг, де ‘рмдзæф фарн хæссæд, адæмы æнгомдзинадыл архайыс, æмæ дæ адæмы хорзæх уæд!
Богазты Арсæмæг, Ирыстоны кадджын ветеран
