Изæр Хусфæрæки
Уг нин даруй уой нæ цæстæмæ,
Ке нæма ’йгъæдгæрон мæйдар,
Лæуун туппурбæл, ’ма фæстæмæ
Гъæдæй æрбайгъусуй мæ зар.
Тайуй бони рохс уингæ-уинун,
Банцадæй согдзаути фæрæт.
’Ссæуй уорс мæйæ гъузгæ-гъузун,
’Срохс уй е ’вналдæй Хусфæрæк.
Изæр рæсог æртæх нийтауй
Æмраст нæ зæнхæ – дарæгбæл.
Мæйрохси хицæмæ нийдайуй
Фæрæтгъæр бабæй сатæгбæл.
Цъимара
Æнай-æнойти цийни саргъбæл
Хъумбæстæмæ рафтудтæн цурд.
Хæтуй уазалтæ уомæл рагъбæл,
Уодмæ кæнунцæ тухлæбурд.
Тæхсун цъимарай пъæзумбæрзтбæл,
Къæхти бунæй «лиу-лиу» ледзуй.
Бурун равзарун мæ хъæстæбæл,
Санс мæ фæстæмæ нæ уадзуй.
Хелуй хæсдзæф ба маргхелагæ,
Медханси хуалибæл зелуй.
Еруй астъæнттæ æхе фагæ,
Цъеути бæдæлттæ æууелуй.
Телуй хъамили агъуд уадæ,
Дортæй дони цуд ихæлуй.
’Згелуй æ билæ имæр цадæ,
Билгон ниууй хулуй – кæлуй.
Арбæл мегъæ тунтæй ци ’лвесуй?
Æзмæлгæй хори, фæлдесуй.
Тавд мæ е ’сæвди нæбал есуй
Æма ’йбæл мæ зæрдæ ресуй.
Ласуй æхемæ мæн цъимара,
Цъируй, æлвасуй, нихъуæруй.
— Гъæйдæ исуадзæ мæ, ма марæ…
Мæ къах сор зæнхæ нæ еруй.
***
Сæумæ – хуæнхбæсти,
Рохс, уазал.
Ма уæд а бæсти
Фуд, адзал.
Ирæф – æ кæрзи,
Гъæр, цæхъал.
Цæрун фæразæ! –
Гъæу – игъал.
Тæрсун бæлæстæн
Цæстудæй.
Цъететæй цæстæ
Рæвдуд æй.
Изæддон арв нин –
Дæ цæсгон!
Нивдулæ царви,
Дигоргом!
Фæлмæ
Сæуæхседи артæй
Фæззиндтæн зæнхи арммæ.
Хъуæлти гъазгæй радæй,
Нæ искастæн мæ сæрмæ
Гиризгæнгæй цардæй,
Ратухстæн цъæх изæрмæ,
Бон еувæрсти рандæй, –
Фæууагъта фæлорс фæлмæ…
Ирд цæстисуг
Æрху – æмир бæстæ!
Æрдзæ сосæг конд æй,
Курмæ ’й лæги цæстæ,
Тухсун неци зонгæй.
Цæрун æнаййевæй,
Фæуун мæтæй расуг, –
Дуйне нæ æййевуй,
Арвæй сайтан уасуй.
Кæун мæ еунæгбæл
Ревæд – уодти мæсуг!
Сæумон деденæгбæл –
Рæсог, ирд цæстисуг…
Цъæрæхснæг
Æхсæркъотæртæ адаги –
Цъæх зæлдагæ изæлуй!
Уалдзæги гъæр мæскъиаги
Ци нæ хузи азæлуй!
Цъæрæхснæгтæн сæумæраги
Сæ цъæхснаг къуар нæ хуссуй,
Цъæр-цъæргæнгæ и даргъ таги
Тæмæссаг зар игъусуй.
Цъæх зæлдæбæл – цурд гæппитæ,
Цъæрæхснæг, о, цъæрæхснæг!
Æхсæрдзæн дин ирд цъæппитæй
Æрæхснадта дæ рæхцæг.
Дæ хуæдсæрмæ – уæйуг тæрсæ,
Æртæх ма йæй и кæрдæг,
Ма мæ фæрсæ, ма ми тæрсæ,
Æрбасæнк кæнæ хæстæг.
Ци дуйней дæ, ци рæсугъд дæ,
Ци инддуг дæ, ци цæрдæг!
Цæмæй цæрис, цæбæл тухст дæ,
Куд æрветис дæ рæстæг?!
Цъæх зæлдæбæл – цурд гæппитæ,
Æртæх ма йæй и кæрдæг.
Дæ къæхтæбæл – алдæнбидтæ,
Цъæрæхснæг, о, цъæрæхснæг…
***
Бамæтавæ, уæлæ хор,
Бони цази.
Бамæуадзæ, мæнæ дор,
Дони рази.
Раминзарæ, зургæ дон,
Бамæазæ,
Мæ гузавæ, хъурмæ бон,
Фæмминласæ.
Раминкафæ æхсицгон,
Уас бæласæ,
Сатæг думги фæззигон,
Тасæ-уасæй.
Баминдарæ, «Арви уод»,
Цардихуасæ.
Нæбал ерун мæ амонд
’Ма мæ уасæ.
Исминесæ мегъи уаргъ
Мæ иуонтæй…
Ма мин уасæ, гъæди маргъ,
Мæ фæсонти…
***
Уорс деденæг бæгъæнсарæй,
Бæгънæгæй зир-зир кæнуй.
Игуæрдæнтæбæл хонсарæй
Цæрдæг думгæ искæлуй.
Хор ставуй ’йæй йæ зæлдагæ,
Йæ сугъзæрийнæ тунтæй
’Ма райгъал уй сæумæраги
Уорс деденæг æ фунтæй.
Рахæлеу унцæ æ тъæфтæ
Æ уарзонмæ изолæй.
… Æрæмпулуй фæсарæфтæ
И деденæг сæркъолæй.
Изæйрон сатæг мæйрохсмæ
Уорс деден хе æрæхснуй.
Æртохуй сифтæй æ ростæ,
Дони зармæ æррæхцуй…
Æрмæджытæ бацæттæ кодта Абайты Эдуард
