Поэт Скъодтаты Эльбрусыл сæххæст 65 азы
Поэт, прозаик, драматург, публицист, критик-библиограф, тæлмацгæнæг, национ преми «Нарты фæткъуы»-йы лауреат (2009), хорзæхджын æрцыд Никитæ Михалков разамынд кæмæн дæтты, уыцы Уæрæсейаг культурæйы фонды Кады грамотæйæ. Майдан «Ирыстоны Намысæн»-æй – хорзæхджын.
Скъодтаты Эльбрус райгуырд Цæгат Ирыстоны Сырх-Дыгуры хъæуы. Иттæг хорз бæрæггæнæнтимæ каст фæци хъæуы астæуккаг скъола, стæй та Цæгат Кавказы хæххон-металлургон институты промышленнон æмæ граждайнаг арæзтады факультет (1983). 1983-æм азы æрвыст æрцыд проектон институт «Севосгипрогорсельстрой»-мæ инженер-аразæгæй, фæстæдæр куыста «Севосетинэнерго»-йы инженер-конструкторæй. Куыста мастер æмæ прорабæй арæзтадон объектты.
1991-æм азæй – журнал «Ирæф»-ы прозæ æмæ поэзийы хайады редактор, 2007-æм азæй уыд пединституты ЮНЕСКО-йы кафедрæйы редактор-тæлмацгæнæг.
Сфæлдыстадон куыст кæнын райдыдта, скъолайы ма куы ахуыр кодта, уæд. Эльбрус у цалдæр поэтикон чиныджы автор. Сæ иу, «Бонивайæн»-ы тыххæй профессор Хъамболты Тамерлан афтæ фыста: «…Чиныджы цъар рафæлдахгæйæ… æмбарыс: ды чиныджы фарс нæ рафæлдæхтай, фæлæ кулдуары дуар бакодтай диссæгты бæстæмæ – Дыгургоммæ. Ам цæрынц, уарзынц æмæ сагъæс кæнынц Эльбрусы хъайтартæ – айнæг къæдзæхтæ, цъæх-цъæхид тархъæдтæ, Дыгуры цъæх фынккалгæ дæттæ – уый у райгуырæн зæххы сыгъдæг суадон. Уыцы сыгъдæг суадонæй поэт исы уæлтæмæн, тых æмæ цардхъомыс. Ам сты йæ уидæгтæ, ам ис йæ уд».
Поэты сфæлдыстады зынгæ бынат ахсы æрдзы темæ, уарзондзинады лирикæ. Йæ сывæллæттæн фыст æмдзæвгæты чиныг «Уодигага» РЦИ-Аланийы Ахуырады министрад бавдыста ахуыргæнæн чиныджы хуызы къласы æддейы кæсынæн.
Скъодтаты Эльбрус фыссы прозаикон æмæ драматикон уацмыстæ. 2012-æм азы рацыд йæ радзырдты, уацмысты æмæ пьесæты чиныг «Фæсонирхæг». Уый у зындгонд ирон фысджытыл фыст бирæ монографиты автор – Малиты Геуæрги, Багъæраты Созыр, Ходы Камал æмæ Хуыгаты Сергейыл.
Скъодтаты Эльбрус разныхæстæ ныффыста 50 чиныгæй фылдæрæн, у бирæ чингуыты редактор æмæ саразæг…
Скъодтаты Эльбрусæн йæ уацмыстæй хуыздæр йæхи тыххæй ничи зæгъдзæн, æмæ йын дæлдæр мыхуыр кæнæм йе ’мдзæвгæтæ.
