Цæгат Ирыстоны Сæргълæууæг Сергей МЕНЯЙЛО дзы сæрдариуæг кодта, афтæмæй уыд Промышленнон продукцийы æнæзакъон зилдухы ныхмæ тохы фарстаты фæдыл республикон къамисы ацы азы кæронбæттæн æмбырд. Фембæлды архайджытæ бахыгътой 2024 азы куысты бæрæггæнæнтæ, стæй фæнысан кодтой хæстæгдæр фидæны архайды пълантæ.
Боны фæткы фарстатыл дзургæйæ, Сергей Меняйло куыд бафиппайдта, афтæмæй уæлдай ахсджиаг у, цæмæй базарадмæ фæндаг ма уа контрафактон, йæ хæрзхъæддзинад цауд кæмæн уа, ахæм продукци æмæ товартæн. «Закъон-
æвæрынады уагæвæрдтæ æмæ товарон «ГОСТ»-ты домæнтæ ницæмæ даргæйæ, цы продукци уагъдæуы, уый знаггад хæссы адæмы æнæниздзинадæн, республикæйы экономикæйæн. Сæвзæргæ экономикон æууæлты ацы фарстатæм хъæуы бæстон цæстдард», – бацамыдта регионы разамонæг.
Профилон æмæ цæстдарæг ведомствæты минæвæрттæ сæ докладты радзырдтой, афæдзы дæргъы хойраджы продукцийы хæрзхъæддзинад куыд бæрæг кодтой, промышленнон товарты æнæзакъон зилдухы ныхмæ цы мадзæлттæ арæзтой, уый тыххæй.
«Роспотребнадзор»-ы республикон управленийы специалисттæ афæдзы дæргъы базаргæнæг организацитæм цы рейдтæ кодтой, уыдоны бæрæггæнæнты бындурыл сарæзтæуыд административон æгъдаухæлдтыты тыххæй 1 300 суагъæйæ фылдæр. Уыцы куысты архайынц Мидхъуыддæгты минис-
трады, Таможняйы федералон службæ æмæ иннæ ведомствæты минæвæрттæ. Уыцы æнгом æмархайды фæрцы къухы бафтыд базарадмæ фæндаг æрæхгæнын, санитарон-эпидемиологон домæнтæн дзуапп чи нæ лæвæрдта, ахæм продукцийæн. Уыимæ, ивгъуыд азимæ абаргæйæ, зынгæ фæкъаддæр, йæ хæрзхъæддзинад цауд кæмæн уыд, ахæм раиртæст продукцийы бæрц дæр. Зæгъæм, санитарон-химион домæнтæм гæсгæ, цауд продукцийы бæрц уыд 0,1 проценты (2023 азы – 0,8 проценты), микробиологон домæнтæм гæсгæ – 3,2 проценты (2023 азы – 4,2 проценты).
Къамисы фидæн азы архайды нысантыл дзургæйæ, æмбырды архай-
джытæ рагагъоммæ пъланмæ бахастой фиппаинæгтæ æмæ бафтауинæгтæ. Уыимæ, куыд загъдæуыд, афтæмæй пъланмæ рæс-
тæджы домæнты бындурыл хаст цæудзæн хъæугæ ивддзинæдтæ.
РЦИ-Аланийы
Сæргълæууæг
æмæ Хицауады
пресс-службæ
