Фыдыбæстæйы Стыр хæсты Уæлахизы 80 азы кадæн нæ республикæйы цы алыхуызон мадзæлттæ арæзт уыдзæн, уыдоны ‘хсæн сты спортивон ерыстæ дæр.
Сæ иу у Фыдыбæстæйы Стыр хæсты хъæбатырæй фæмардуæвæг, Дзæуджыхъæуы Хæххон-металлургон институты æфсæддон-физкультурон кафедрæйы разамонæг Леонид Саблины æрвылазон номарæн турнир футболæй.
Номарæн турнир арæзт æрцыд фæндзай азы размæ, æмæ дзы фæархайынц Ирыстоны футболуарзджыты командæтæ.
Ацы азы ерыстæ райдыдтой 1 февралы, æмæ дзы Леонид Саблины номыл Кубок рамбулыныл ерыс кæнынц фараст командæйы: «Дигора», «Автодор», «Киммери», «Хъæдгæрон», «СКГМИ», «ГМТ», «Юность», «Барс», «ДЮСШ» (Алагир).
Командæтæ сæ фыццаг хъæзтытæ акодтой 1-2 февралы. Уыцы бонты фембæлдтытæ ахицæн сты ахæм хыгъдтимæ: «Автодор» – «СКГМИ» – 1:2, «Киммери» – «ГМТ» – 3:0, «Дигора» – «Хъæдгæрон» – 4:2…
Турниры хъазæг фараст командæйы дихгонд сты æртæ дæлкъордыл. Уыдоны 1-2-аг бынæттæ бацахсджытæ сбæрæг уыдзысты 15-16 февралы. Уый фæстæ сæ дæлкъордты 1-2 бынæттæ бацахсджытæ кæрæдзиимæ фембæлдтыты сбæрæг кæндзысты кæронбæттæнмæ рацæуæг командæты, æмæ æппынфæстаг 1 мартъийы футболон скъола «Юность»-ы стадионы бæрæггонд æрцæудзæн Леонид Саблины номыл Кубок рамбулæг командæ.
Куыд алы хатт, афтæ ацы аз дæр турнир аразæг у Цæгат Кавказы хæххон-металлургон институт. Фембæлдтытæ цæуынц Дзæуджыхъæуы, стадион «Юность» æмæ Дигорайы стадионы. Хъæзтытæ райдайынц сабат æмæ хуыцаубоны 10-12 сахатыл.
Баскаты Уырызмæг
