Фыццаградон национ проект «Æнæниздзинад хъахъхъæнынад»-ы уагæвæрдтыл куыст æнтыстджынæй ахицæн. 2025 азæй фæстæмæ та бæстæйы цæрджыты æнæниздзинад æмæ медицинæйы къабазы нывылады фарстатæ лыггонд цæудзысты ног национ проект «Дæргъвæтин æмæ фæрныг цард»-ы фæткмæ гæсгæ.
Уый тыххæй фехъусын кодта РЦИ-Аланийы Æнæниздзинад хъахъхъæнынады министрады пресс-службæ.
Министрады минæвар куыд фæбæрæг кодта, афтæмæй иннæ уæрæсейаг регионты æмрæнхъ Цæгат Ирыстон дæр бавналдзæн ног национ проекты уагæвæрдтыл куыстмæ.
Уыцы архайды сæйрагдæр фæзилæнтæй иу у медицинон кусæндæтты ифтонгдзинад хъæугæ специалисттæй. Уымæн ахъаз уыдзысты ног национ проекты дæлхайæдтæ – федералон программæтæ «Хъæууон дохтыр» æмæ «Хъæууон фелсыр». Рагагъоммæ куыд нысангонд æрцыд, афтæмæй 2025 азы республикæйы уыцы программæты архайæг суæвыны фадат уыдзæн 24 дохтыр æмæ 2 фелсырæн (уыдонæй иуæн йæ куысты бынат уыдзæн дæрддзæф хъæуы).
Амынд программæты архайын æмæ йæ куысты бынат хъæууон медицинон кусæндонмæ раивыны фæнд чи равдиса, уыцы специалисттæн иухаттон паддзахадон æххуысы хуызы дихгонд æрцæудзæн: дохтыртæн – фæйнæ 1 милуан сомы, фелсыртæн – фæйнæ 500 мин сомы (уыимæ, дæрддзæф хъæууон цæрæн бынаты кусын чи сфæнд кæна, уыцы специалистæн – 750 мин сомы). Æмткæй райсгæйæ, уыцы 26 медицинон кусæгæн паддзахадон фиддон раттыны хæрдзтæн нысангонд æрцыд 25 милуан сомæй фылдæр.
Министрады минæвар куыд бафиппайдта, афтæмæй ивгъуыд азы дæр амынд программæты фæлгæты 26 специалисты сæ куысты бынæттæ раивтой хъæутæм. Уыимæ, программæтæ «Хъæууон дохтыр» æмæ «Хъæууон фелсыр»-ы фæрцы цæгат-
ирыстойнаг хъæууон медицинон кусæндæтты специалисттыл бафтыд 300 адæймаджы бæрц. Уыдоны нымæцы – терапевттæ, педиатртæ, реаниматологтæ, хирургтæ, фелсыртæ æмæ æндæр специалисттæ.
КАЛМАНТЫ Аслан
