«Россельхознадзор»-ы цæгаткавказаг регионты иумæйаг управленийы хъусынгæнинагмæ гæсгæ, арæны сæрты уадзæн бынат «Уæллаг Ларс»-ыл Цæгат Ирыстонмæ ласт халсартæ æмæ дыргъты бæрц 64 проценты фæфылдæр.
Афæдзы райдайæнæй нырмæ фæсарæнтæй нæ республикæмæ æрбафтыд 70 мин тоннæйы бæрц продукци. Уыцы продукцийæ 60,5 мин тоннæйы бæрц уæзæгтæ æрбаластой Уæрæсейы фæзуатыл сæ ауæй кæнынæн, иннæ продукци та транзитон уагæй аластой Таможняйы цæдисы бæстæтæм (Белорусси, Казахстан, Киргизи) æмæ Узбекистанмæ.
Æппæтæй фылдæр нæм товартæ æрбафтыд Гуырдзыстонæй (35 мин тоннæйæ фылдæр). Ацы бæстæйæ нæм æрбаластой картоф (24 мин тоннæйы), стæй дыргътæ, пъамидортæ, къабуска æмæ лавры сыфтæ.
Сомих Уæрæсемæ æрбарвыста 13,7 мин тоннæйæ фылдæр халсартæ æмæ дыргътæ (фæткъуытæ, пъамидортæ, картоф, джитъритæ æмæ æндæртæ).
Туркæй æрбаластæуыд 11,6 мин тоннæйы мандаринтæ, гранаттæ, пъамидортæ, лимонтæ, апельсинтæ æмæ кабачкитæ.
Нæ уацхæссæг
