РЦИ-Аланийы Сæргълæууæг Сергей МЕНЯЙЛОЙÆН Мæскуыйы фембæлд уыд Уæрæсейы Хицауады Сæрдары хæдивæг Александр НОВАКИМÆ. Ныхасы архайджытæ æрдзырдтой Цæгат Ирыстоны дарддæры социалон-экономикон райрæзты нысантыл.
Сергей Меняйло радзырдта, республикæйы цæрæнуатон-коммуналон хæдзарад æмæ энергетикæйы комплексы кусæндæтты хъомыс бæрзонддæр кæныны программæ куыд æххæстгонд цæуы, уый тыххæй. Сæрмагонд æргом аздæхтæуыд регионы дарддæры газификацийы пълантæм. Уымæй уæлдай, рæгъмæ рахастæуыд республикæйы сæйрагдæр æмæ ахадгæдæр инвестицион проекттыл куыст дæр.
Хæстæгдæр фондз азы дæргъы цы ахсджиаг проекттыл куыст цæудзæн, уыдон комкоммæ сахаддзысты республикæйы экономикон уавæрыл: рæздзæн кусæн бынæтты нымæц, фылдæр кæндзæн хъалонтæ фидыны бындур, бюджеты æфтиæгтæ уыдзысты ахадгæдæр…
Уыимæ, ныридæгæн цалдæр проекты къæпхæнгай сæ хъомыс æвдисын райдыдтой. Афтæ, тыллæг дæттын райдыдта компани «Казачий хутор»-ы фæткъуыйы дыргъдон (йæ фæзуат у 1 000 гектарæй фылдæр), байгом хъæрмуæтты комплекс «Алания»-йы фыццаг хай (æппæт комплексы арæзтад ахицæн уыдзæн 2026 азы), куыстуат «Виноградарь Кавказа»-йы ныссагътой сæнæфсирдæтты 400 гектары бæрц, хæдзарад «Остров Аквакультура»-йы сарæзтой кæсагдарæн 100 бассейнæй фылдæр…
Ацы æмæ иннæ ахсджиагдæр инвестицион проектты иумæйаг аргъ у 73 миллиард сомæй фылдæр. Уыдоны фæрцы 2030 азмæ республикæйы хъуамæ фæзына 6 000 ног кусæн бынаты бæрц. Абоны онг уал амынд проекттыл хардзгонд æрцыд 45 миллиард сомæй фылдæр. Уый фадат ратта 1,1 мин кусæн бынаты байгом кæнынæн.
РЦИ-Аланийы Сæргълæууæг æмæ Хицауады пресс-службæ
