Фыдыбæстæйы Стыр хæст… Уыцы азты фашистон æрдонгты æвирхъау æрбалæбурды рæстæг советон адæм бавзæрстой бирæ хъизæмæрттæ: хæст кæм стынг, уыцы бынæттæй сæ сыстын бахъуыд, лигъдоны хъысмæт чи бавзæрста, уыдоны дæр знаг фæндæгтыл цагъта, хæдтæхджытæй сыл бомбæтæ калдта… Фашистты уыцы фыдракæндтæ сты æцæг геноцид. Хæсты азты чи бабын, уыцы æнаххос адæмы номарæн изæр уыд Адæмты хæлардзинады республикон хæдзары.
Цыфыддæр знаг уыцы азты бæстæ æмæ Цæгат Ирыстонæн цы экономикон зиантæ ракодта, немыцæгтæ цы горæттæ æмæ хъæутæ бацахстой, уым адæм куыд цардысты, фæстæдæр Советон æфсæдтæ республикæ æмæ Цæгат Кавказ фашистты æрдонгтæй куыд асыгъдæг кодтой…
Æппæт уыцы хабæртты тыххæй æрыгон фæлтæры минæвæрттæн сæ мысинæгтæ радзырдтой фембæлды кадджындæр уазджытæ: Фыдыбæстæйы Стыр хæсты ветеран, концентрацион лагерь «Освенцим»-ы уацайраг Карсанты Владимир æмæ Фыдыбæстæйы Стыр хæсты архайæг, зенитон-артиллерион полчъы шофыр Арутюн Хачикян.
Нæ буц ветеранты радзырдтæ баххæст кодтой Адæмты хæлар-дзинады республикон хæдзары директор Александр Охотников, историон наукæты кандидат Хъайтыхъты Георги, УФ-йы Гæрзифтонг тыхты булкъон, политикон наукæты кандидат Николай Левченко, мидхъуыддæгты оргæнты булкъон отставкæйы Иван Маторов, РЦИ-Аланийы Истори æмæ археологийы институты директоры хæдивæг Еналдыты Хъазыбег æмæ фембæлды иннæ архайджытæ.
Раныхасгæнджытæ æрыгон фæлтæры минæвæрттæм фæсидтысты, цæмæй æнувыд уой Райгуырæн бæстæйыл, иудадзыгдæр тырной Фыдыбæстæйы аккаг граждæнтæ суæвынмæ, æнæ-уынондзинад æвдисой нацистон æмæ æндæр ахæм знаггадхæссæг идеологимæ…
«Фембæлды архайджытæ уыдысты æмхъуыды: хæстон 1941-1945 азты советон адæм цы геноцид бавзæрстой, уый æвдисæг историон документтæ æмæ хабæрттæн рохгæнæн нæй. Æппæт дæр аразын хъæуы, цæмæй нацистон иделогийæн зæххыл бынат мауал уа», – æмбырдæн хатдзæгтæ кæнгæйæ, бафиппайдта РЦИ-Аланийы национ политикæ æмæ æддагон бастдзинæдты министры уынаффæгæнæг Хъайтыхъты Тамарæ.
КАЛМАНТЫ Аслан
