Дзæуджыхъæуы уыд наукон-практикон конференци «Стыр бæстæ. Стыр истори. Стыр Уæлахиз». Æмбырды архайджыты раз раныхас кодта РЦИ-Аланийы Сæргълæууæг Сергей Меняйло.
Конференцимæ саккаг кодтой республикæйы паддзахадон æмæ муниципалон хицаудзинады оргæнты разамонджытæ, ветерантæ æмæ æндæр æхсæнадон иугæндты минæвæрттæ, наукæ æмæ культурæйы архайджытæ, ахуырдзау фæсивæд…
Сергей Меняйло йæ раныхасы фæбæрæг кодта, Стыр Уæлахизы 80 азы юбилейы бонты ахæм конференцитæн уæлдай ахсджиаг нысаниуæг кæй ис, уый. Уыимæ, йæ ныхасмæ гæсгæ, Уæрæсейы ныхмæ информацион ныхмæлæуддзинад чи расидт, уыдонæн дæр хъæуы аккаг ныхкъуырд дæттын.
– Не ’ппæт дæр æвдисæн стæм, фæстаг дæсгай азты дæргъы нæ «хæрзгæнджытæ» истори зыгъуыммæ кæныныл кæй архайынц, уымæн. Уыдоны архайдæй дзырддаг сси, Дыккаг дунеон хæстæн кæрон сæвæрынмæ стырдæр æвæрæн чи бахаста, уыцы хъуыддаг дæр. Фæлæ мах алкæцы 9 майы дæр дунейы зæрдыл æрлæууын кæнæм уыцы уæлахизы аргъ – хæсты азарæй бабын сты 30 милуан советон адæймагæй фылдæр. Ахæм зæрдæриссæн нымæцтыл дзургæйæ, чи хъуамæ сфæраза, раздæры Советон Цæдисы адæмтæ иумæйаг уæлахизмæ цы æгæрон æвæрæн бахастой, уый дæлдзиныг кæнын? Уыцы рæстæджыты иунæг паддзахад дæр нæ бав-
зæрста, мах бæстæ цы зындзинæдтæ æмæ хъизæмæртты сæрты ахызт, уыдон. Уый хынцгæйæ, ныртæккæ вазыгджындæр нысан у, цæмæй рæзгæ фæлтæртæ зоной историон рæстдзинад. Алкæцы адæмæн дæр сæйрагдæр удварнон хæзнатæ сты йæ истори æмæ культурæ – уыдон бахъахъхъæныныл хъуамæ æвæллайгæйæ кусæм. Уымæн æмæ уыцы удварнон хъомыс куы нæ уал уа, уæд нæхæдæг дæр цы уыдзыстæм? Иу ныхасæй, цас бæстондæр зонæм нæ истори, цас хуыздæр хъахъхъæнæм нæ культурæйы удварн, уый бæрц тыхджындæр, фидардæр уыдзыстæм, – йæ раныхасы фæбæрæг кодта Цæгат Ирыстоны Сæргълæууæг.
Конференцийы архай-джытæ докладтæ скодтой Фыдыбæстæйы Стыр хæсты сæйрагдæр цауты тыххæй, сæрмагондæй æрлæууы-дысты Кавказыл хæстыты нысаниуæгыл, бафиппайдтой, Ирыстоны хъæбултæ тохы быдыры æмæ фæсчъылдымы цы хъæбатыр-дзинад æмæ Райгуырæн бæстæйыл æнувыддзинад æвдыстой, уый цæвиттонтæ…
Зонадон форумæн фадæттæ сарæзтой Уæрæсейы æфсæддон-историон æхсæнады цæгатирыстойнаг хайад æмæ Дзæуджыхъæуы бынæттон хиуынаффæйады администраци.
Сланты Аслан
