Кæрдзыны хъæуы администрацийы сæргъы Андиаты Сослан æрлæууыд 2023 азы æмæ уæдæй нырмæ, зæгъын æмбæлы, æнцой нæ зоны. Уый зын бамбарæн нæу – алы горæты, алы хъæуы социалон-экономикон рæзты пъланы дæр ис сæ фæзуаты иумæйаг рæзты фарстатæ. Уыдонмæ та иудадзыг цæст дарын хъæуы. Администрацийы сæргълæууæгæн афæдзы алы афон дæр
куыст бирæ ис, уæлдай фылдæр та – уалдзæгæй фæззæгмæ, хæрзвадæтты, сыгъдæгдзинады фарстатæ боны фæткы æрвылбон куы вæййынц, уæд.
Сусæггаг нæу: хъæуты бюджеттæ бынтон хъæздыг не сты, æппæт æнæмæнг лыггæнинаг фарстатæн дзы фаг фæрæзтæ нæ вæййы, фæлæ уый хыгъд ныртæккæ, алы паддзахадон проектты, федералон æмæ республикон программæтæ æмæ дæлпрограммæты архайгæйæ, къухы бирæ хъуыддæгтæ саразын бафты. Уæдæ цы архайæг у абон Андиаты Сослан? Ныридæгæн уал цавæр фарстатæ лыггонд æрцыдысты, дарддæр æм цы пълæнттæ ис? Уыцы фарстытæн хъæуыхицау йæхæдæг ахæм дзуапп ратта:
– Нæ хъæуы цæры 2959 адæймаджы, уыимæ – бирæ адæмыхæттыты минæвæрттæ. Æхсæнадон бынæттæ банывыл кæныны хъуыддаджы нæхи хъомысджындæрæй равдисын кæй хъæуы, уый æмбарын кæнæм нæ цæрджытæн. Ам нæ фарсмæ æнгом лæууынц бархионтæ, уыдон дæр – нæхи хъæуы цæрджытæ, официалон æгъдауæй регистрацигонд сты. Æхсæнадон бынатыл схъæлæс кæнын куы фæхъæуы, уæд уынгты планшеттимæ æрзилынц. Æрыгæттæ сæхæдæг сæрæн сты, Паддзахадон лæггæдты сайты схъæлæс кæнынц. Ацæргæ адæмæн æмбарын кæнынц: куыд фылдæр адæм схъæлæс кæна объект банывыл кæныныл, афтæ тагъддæр пъланмæ хаст æрцæудзæн. Уыцы куыстæн ис хорз фæстиуджытæ. Фарон ме ‘мхъæуккæгтæ æрцыдысты иу хъуыдымæ: Слоны-фырты уынг сцалцæг кæныныл схъæлæс кодтой, æмæ ныртæккæ подрядон организаци куыстытæм бавнæлдта. Ам аразынц 1,5 километры дæргъæн тротуар, сæвæрдзысты дзы фæхсбадæнтæ, ныссадздзысты дзы цæджындзытæ, æрцауындздзысты сыл нырыккон рухсгæнæнтæ. Куыс-тытæ цæуынц æмгъуыдмæ гæсгæ.
Фидæны азмæ та ныртæккæ цæуы хъæлæс кæныны кампани Камбилеевскаяйы уынг банывыл кæныныл. Уым та тротуар асфальтбетонæй æмбæрзт æрцæудзæн, зæронд хус бæлæстæ акалдзысты, рухсытæ дзы ныссадздзысты, уыдзæн дзы фæхсбадæнтæ æмæ быронæмбырдгæнæнтæ. Ныр нын дзæвгар фенцондæр, уымæн æмæ цæрджытæ уынынц, алкæй хъæлæс дæр ахсджиаг кæй у Кæрдзыныхъæуы фæлгонц фæрæсугъддæр кæнынæн. Архайæм æндæр программæты дæр: фæсивæды хъæуы спортивон фæз-уат, сывæллæтты – хъазæн фæз, агурæм спонсорты, инвесторты, се
‘ххуысæй нын хъуамæ уыдæттæ саразын бантыса, – зæгъы Сослан.
Уæлахизы 80 азы бонмæ Кæрдзыны хъæуы дæр стыр куыст бакодтой: хæсты чи фæмард, уыцы æмхъæуккæгты цыртдзæвæнмæ иудадзыг зилынц, уынгты санитарон уавæр дæр зæрдæхсайгæ нæу. Цы ивддзинæдтæ цæуы хъæуы, уыдонæй зæрдæ рухс кæны.
Царды рæстдзинад цæй мидæг ис? Адæм æууæндынц, йæ ныхасæн хицау чи у, хъуыддæгтæ чи аразы, йæ алыварс чи ис, уыдоны хорздзинадыл, сæ царды уавæртæ сын фенцондæр кæныныл зæрдиагæй чи архайы, зындзинæдтæй чи нæ тæрсы æмæ бæрнондзинад йæхимæ чи исы, ахæм разамонæгыл. Уыцы миниуджытæй хайджын у Андиаты Сослан.
ГАПБАТЫ Алетæ
