Венгрийы сæйраг горæт Будапешты 13-20 июны дзюдойæ цæудзысты дунеон чемпионаты ерыстæ. Дзюдойы Уæрæсейы Федераци сбæрæг кодта, нæ бæстæйы сылгоймæгтæ æмæ нæлгоймæгты командæты рæнхъыты чемпионаты чи архайдзæн, уыдоны номхыгъд.
Уæрæсейы сылгоймæгты командæйы 70 кг онг уæзы татамимæ рацæудзысты Олимпиаг хъæзтыты 3-аг бынат бацахсæг, спорты сгуыхт мастер Таймазты Мæдинæ æмæ Дарья Антонова. Иннæ уæзты та уыдзысты: 48 кг – Сабинæ Гилязова æмæ Маринæ Воробьева, 57 кг – Иринæ Зуева æмæ Дарья Курбонмамадова, 63 кг – Дали Лилуашвили, 78 кг + – Элис Старцева æмæ Мария Иванова.
Нæлгоймæгты командæйы рæнхъыты уыдзысты: 60 кг – Аюб Блиев, 66 кг – Рамазан Абдулов æмæ Мурад Чапанов, 81 кг – Михаил Игольников, 100 кг – Матвей Каниковский æмæ Арман Адамян, 100 + – Тасойты Инал æмæ Тамерлан Башаев.
Уæрæсейаг дзюдоисттæн раттой ерысты дзюдойы Дунеон федерацийы тырысайы номæй хæцыны бар.
Ацы хъуыддаг æфхæрды хуызæн кæд у, уæддæр, æвæццæгæн, бафæразын хъæуы, æмæ, татамийы нæ дзюдоисттæ цас æнтыстджындæр уой, уый дзурæг уыдзæн, ныгуылæйнаг политиктæ æмæ се ’мгуыстгæнæг спортивон чиновниктæ дунеон спортивон змæлдæн знаггадгæнæг кæй сты, ууыл.
Ирыстоны спортуарзджыты уырны, уæрæсейаг дзюдоисттæ тыхджындæртæй кæй уыдзысты, семæ нæ уарзон æмзæххонтæ Тасойты Инал æмæ Таймазты Мæдинæ, афтæмæй.
Баскаты Уырызмæг
