Евгений Вахтанговы номыл Академион уырыссаг театры сценæ æнус æмæ æрдæджы дæргъы бирæ федта спектакльтæ, уымæй фылдæр – актерты, аивадон архайджыты. Фæлæ дзы знон цы спектакль уыд, æмæ дзы цы актертæ хъазыд, ахæм Цæгат Кавказы рагондæр театралон сценæ федта фыццаг хатт. Сæ курдиат дзы равдыстой æрыгон актертæ – Мæздæджы сывæллæтты театр «Солнечный город». Йæ архайджытæ та сты, æрдз æнæниздзинад æххæстæй кæмæн нæ ратта, фæлæ уый хыгъд зæрдæйы бæркадæй кæй фæхайджын кодта, «хурæнгæс» кæй хонынц, ахæм сывæллæттæ.
Ацы театр рагæй у хъуыстгонд, стæй канд Мæздæджы районы нæ, фæлæ æппæт республикæйы дæр. Суанг ма сфæлдыстадон балцыты ацæуынц нæ бæстæйы æндæр горæттæм дæр. Йæ архайдæй театр тауы фæлмæнзæрдæ, рæдаудзинад, кæстæрты æфтауы адæймаджы хуыздæр миниуджытыл, зæрдæйы гуырын кæны фæлмæн æнкъарæнтæ. Рынчын сывæллæттæ сæхи цæмæй хуыздæр æнкъарой æмæ аивады фæрцы æхсæнадмæ æмхицдæр кæной, ууыл ныр бирæ азты дæргъы зæрдиагæй архайы театры аивадон разамонæг Еленæ Давыдова.
Уырыссаг театры сценæйыл сæ спектаклтæй иу равдисын уыд сæ рагон бæллиц, æмæ йæ Еленæ Давыдова фехъусын кодта, амæй размæ Парламенты депутаттæ, сæ сæргъы – Парламенты Сæрдар Тускъаты Таймураз, афтæмæй кусæг балцы Мæздæджы районы куы уыдысты, æмæ сын уым районы культурæйы къабазы кусджытимæ фембæлд куы уыд, уæд. Уым Тускъаты Таймураз зæрдæ бавæрдта сывæллæтты театр «Солнечный город»-æн сæ бæллиц сæххæст кæнынæй, æмæ йæ дзырдæн, куыд алкæд, афтæ ацы хатт дæр хицау разынд.
Уæрæсейы боны агъоммæ сывæллæтты театр бацæттæ кодта æмæ Уырыссаг теарты сценæйыл равдыста, адæймаджы фæлмæнзæрдæдзинадыл, рæвдауæг æмæ уарзæгой миниуджытыл чи ахуыр кæны, ахæм спектакль. Æмæ куы фæци, уæд залы бадæг адæм, сæ фылдæр, кæй зæгъын æй хъæуы, сывæллæттæ, сарæзтой тыхджын къухæмдзæгъд. Еленæ Давыдова сценæйæ арфæ ракодта Тускъаты Таймуразæн, сывæллæтты бæллиц сæххæст кæнынæн фадæттæ кæй сарæзта, уый тыххæй.
Парламенты Сæрдар та, æрыгон актертæ æмæ сæ чи бацæттæ кодта, уыцы хистæртæн арфæ кæнгæйæ, загъта:
– Сывæллæттæ сты нæ фидæн. Нæ алы къахдзæф, нæ алы хъуыддаг дæр у уыдоны хорздзинадæн. Æмæ спектаклы кæрон уæ алкæй къухы дæр цы гыццыл зынг ссыгъд, уыцы зынг уадз æмæ судза уæ зæрдæты дæр æмæ уын уæ царды фæндæгтæ рухс кæна.
Мæздæджы сывæллæтты театр «Солнечный город»-æн Тускъаты Таймураз балæвар кодта компьютерон техникæ, театры разамонæг Еленæ Давыдовайæн та – Рес-
публикæ Цæгат Ирыстон-Аланийы Парламенты Кады гæххæтт.
Сывæллæтты театрæн ма сценæйæ арфæйы ныхæстæ дзырдтой æмæ зæрдæлхæнæн лæвæрттæ скодтой республикæйы Æхсæнадон палатæйы сæрдар Нинæ Чиплакова, Уæрæсейы Театралон архайджыты цæдисы цæгатирыстойнаг хайады сæрдар
Гуыбиаты Хъазыбег æмæ Уырыссаг драмон театры коллектив.
ДЕДЕГКАТЫ Зæлинæ, къам систа
Татьянæ Шеходанова
