Цæгат Кавказы арæзтадон техникумы студенттæ фестиваль «Zа Родину»-йы аккаг
хуызы равдыстой нæ республикæ. Цæгатирыстойнаг «Скиф»-тæ архайдтой хæстон-патриотон фестивалы, ацыд Грознайы Паддзахадон Цæцæйнаг педагогон университеты.
Фестиваль саразыны хъæппæрис равдыста университеты хæстон-патриотон центр «Воин-Ахмат». Уырдæм Цæгат Кавказы федералон зылдæй æрæмбырд сты уæлдæр æмæ профессион ахуырады студенттæ. Йæ программæ уыд хъæздыг æмæ цымыдисаг. Цæгат Ирыстоны минæвæрттæ архайдтой алыхуызон мастер-классты, конкурсты, викторинæты, практикон ахуырты. Фыццаг бон равдыстой теоретикон цæттæдзинад: студенттæн тренингтæ скодтой тæхæн аппараттæй, тактикон медицинæйæ, æхсынæй, хæстон топографийæ.
Бон ахицæн хæстон историйы интеллектуалон викторинæйæ, студенттæ равдыстой сæ зонындзинæдтæ. Дыккаг бон æвдыстой сæ практикон арæхстдзинæдтæ. Сæ бон бацис АК-74 рæвдз райхалын, мысанмæ хæцæнгарзæй æхсын, цæфты эвакуаци кæнын куыд хъæуы, ууыл. Гæрæнты сæрты хизгæйæ, æрыгæтты бахъуыд физикон цæттæ-дзинад æмæ иумæйаг архайд равдисын.
Фестивалы архайджытæ спорты алы хуызты сæ арæхстдзинад, тых æмæ быхсондзинад равдыстой. Изæрыгон уазджытæ атезгъо кодтой горæтыл, базонгæ сты йæ рæсугъддзинæдтимæ.
Ахуырад æмæ наукæйы министрады пресс-службæ
