Алы афæдзы æмбис дæр адæмæй курæм, рафыссут газет, зæгъгæ. Афтæ зæгъæн нæй, æмæ газеттæ никæйуал хъæуынц, фæлæ сæ афойнадыл ничиуал исы, æмæ адæм телефонтæй редакцитæм дзурынц.
Райсомæй куыстмæ цæугæйæ мыл мæ сыхæгтæ цалдæрæй амбырд сты æмæ мын
рахъаст кодтой, дыууæ къуырийы газеттæ «Рæстдзинад» æмæ «Северная Осетия» кæй нал райстой.
– Зынаргъ кæй сты газеттæ афæдзы æмбисæн, ууыл нал дзурæм, фæлæ ма сæ афойнадыл исгæ дæр нæ кæнæм. Посты хайадмæ лæдзæджы æнцæйтты ныццыдтæн, мæ газеттæ кæм сты, зæгъгæ, сæ бафæрсон, æмæ мын ахæм дзуапп раттой, постхæссæг, дам, отпусчы ис. Æмæ уый махмæ цæмæ хауы? Постхæссæг кæд йæ фæллад уадзы, уæд хъуамæ посты хайад йæ куыст баурома, цалынмæ кусæг отпускæй рацæуа, уæдмæ? Дыууæ къуырийы сæ сæхимæ фæдардтой, стæй мын сæ æмбырдæй рахастой. Нал сæ райстон, уымæн æмæ хабæрттæ иууылдæр телеуынынадæй базыдтон, æмæ ма цы кодтон зæронд газеттæй? Кæй бафæрсæм, кæмæ бахæссæм нæ хъаст? Афтæ дарддæр куы цæуа, уæд газет нал рафысдзынæн, – мæстджынæй дзырдта мæ сыхаг, карджын сылгоймаг.
Посты бастдзинад кæд газеттæ æмæ журналтæ рафыссыныл нал архайы, уæд сæ куыст цæй мидæг ис, пенситæ дæр картæтæм æрвыст куы цæуынц, уæд? Дуканитæ рауайын кодтой, кæддæр советон азты алыхуызон открыткæтæ æмæ газеттæ цы тæрхæджытыл лæууыдысты, уыдонæй. Сæкæр æмæ шоколад дуканийы ис балхæнæн, уæд сæм постмæ цæуын цæмæн хъæуы?
80-æм азты хорз хъуыды кæнын Алагиры нæ постхæсджытæ Плиты Валя æмæ Томайты Зифæйы. Ацы сылгоймæгты хуызæн постхæсджытыл æз никуыуал сæмбæлдтæн. Скъоладзаутæ уыдыстæм, æмæ-иу нæ уд, нæ цæст фæс-уроктæ посты хайадмæ бауайын уыдис. Нæ зæрдæтæ нын тынг сæхимæ æлвæстой хуызджын цъар журналтæ æмæ открыткæтæ. Уæдæ ныл-иу посты кусджытæ куыд зæрдиагæй сæмбæлдыс-ты, мидбылхудт æмæ цинимæ! Абон ма посты хайады скъоладзауы исчи фендзæн? Алы бон дæр-иу газеттæ афоныл нæ кулдуæртты асыччыты дардмæ дæр урсæй зындысты. Уыцы уысмæй фылдæр ницы уарзтон, ракæс, æмæ асыччы – газет. Валя æмæ Зифæ абон дæр мæ цæстытыл уайынц.Къæвдайæ, хурæй, митæй-иу сæ цыд нæ уагътой. Уыимæ цалдæргай дæргъæй-дæргъмæ уынгыл-иу æххæсгæ та куыд кодтой. Уæдæ никуы базыдтам, исчи сæ отпусчы ис, уый дæр, сæ куыст афтæ лæмбынæг æххæст кодтой. Стыр мыздтæ нæ истой, фæлæ, цы хъуыддаджы лæуд уыдысты, уымæ кастысты бæрнонæй. Уый уыдис советон цардарæзты æхсæнадон фидар æмæ нывыл фæтк.
Мæ сыхæгтæн та цавæр дзуапп раттаин, уый нæ зыдтон, фæстæмæ дæр ма мæм дзырдтой, изæры, дам, нын хабар бамбарын кæн. Редакцийы кусджытæ стут æмæ баныхас кæнут постимæ, цæмæй нæ газеттæ исæм, уый тыххæй. Ватутины уынджы кæронæй посты хайадыл мæ фæндаг акодтон, æмæ мын загътой, кусджытæ сæм кæй нæ фаг кæны, æмæ уый аххосæй газеттæ нæ хæццæ кæнынц адæммæ. Кæй зæгъын æй хъæуы, посты хайады сæргълæу-уæг йæхæдæг нæ ацæудзæн газеттæ уарынмæ, фæлæ сæ кусæджы дæр æнæ фæллад уагъдæй куыд ныууадзой? Уавæр къуырцдзæвæны ис, æмæ дзы адæм куыд рахизой, уымæн мадзал нæ арынц.
Саутæты Тамилæ
