РЦИ-Аланийы Хицауады æрвылкъуырион аппаратон æмбырд амыдта республикæйы Сæргълæууæг Сергей МЕНЯЙЛО. Ныхас цыд республикæйы социалон-экономикон æмæ царды æндæр ахсджиаг фарстатыл. Архайдтой дзы Хицауады уæнгтæ, муниципалон скондты сæргълæуджытæ, министрадтæ æмæ ведомствæты разамонджытæ.
Хицауады Сæрдары хæдивæг Томайты Ирбег йæ доклады фехъусын кодта, республикæйы дарддæр дæр æнæнхъæлæджы уавæрты фæтк æххæстгонд кæй цæуы.
– Арвыкомы фæндаг гом у автотранспорты æппæт хуызтæн дæр. Синоптикты хъусынгæнинагмæ гæсгæ, республикæйы хæс-тæгдæр дыууæ суткæйы тæссаг у тыхджын дымгæтæ, къæвдатæ ихимæ æмæ цæугæдæтты раивылынæй.
Республикæйы фæндæгтыл æрцыд 77 фæндагон фыдбылызы, 11 адæймаджы дзы баййæфтой хъыгдард, æвæстиатæй сæ рынчындæттыл сæмбæлын кодтой. Дыууæ адæймаджы дзы, хъыгагæн, фæмард сты.
Цæгат Ирыстоны фæндæгтыл лæууынц 400 уæзласæн машинæйы, уыдонæй 120 – сæрмагонд бынæтты, 200 та – электронон рады, – фехъусын кодта Томайы-фырт.
Мидхъуыддæгты минис-трады хъусынгæнинагмæ гæсгæ, ивгъуыд къуыри мидхъуыддæгты оргæнтæм фехъусын кодтой, базарадон центр «Алания Молл»-ы рæмудзæн æрмæг æвæрд кæй æрцыд, уый тыххæй. Пъæлицæ, Æнæнхъæлæджы уавæрты æмæ тагъд медицинон æххуысы бригадæтæ æвæстиатæй уым ‘рбалæууыдысты. Адæмы цент-ры бæстыхайæ ракодтой. Куыд сбæрæг, афтæмæй хабар мæнг разынд. Дарддæр уыцы хъуыддагыл кусынц слестгæнæн оргæнтæ.
Æнæнхъæлæджы уавæрты министрады хъусынгæнинагмæ гæсгæ, Горæтгæрон районы цыппар хъæуы, Рахизфарсы районы æртæ хъæуы æмæ Алагиры районы иу хъæуы тæссаг у зынгсирвæзтытæй. Министрады æппæт тыхтæ дæр сты бæрзонд цæттæдзинады уавæры.
Зымæджы хъармгæнæн рæстæгмæ цæттæгæнæн куыстытæ кæй фесты, уый тыххæй фехъусын кодта республикон «Водоканал»-ы генералон директоры хæстæ рæстæгмæ æххæстгæнæг Кцойты Тамерлан.
Сергей Меняйло куыд радзырдта, афтæмæй протезтæ аразæг фирмæ «Бионика»-имæ баныхас кодта, цæмæй нæ республикæйы хайад байгом кæна. Уымæ гæсгæ, республикæйы Фæллой æмæ социалон рæзты министрадæн бахæс кодта, сæрмагонд æфсæддон операцийы архайджытæй протез сæвæрын кæмæн хъæуы, уыдоны номхыгъд саразын.
Сергей Меняйло æппæт министрадтæ æмæ ведомствæтæн бахæс кодта дзыллон хабархæссæг фæрæзтимæ фембæлын æмæ бæлвырд æрдзурын министрадты куысты тыххæй, цы сарæзтой æмæ дарддæр цæуыл кусдзыс-ты, ууыл.
Аппаратон æмбырды ма ныхас цыд, социалон рæзты национ æмæ паддзахадон программæтæ куыд æххæстгонд цæуынц, ууыл. Национ программæтæн сæххæст кодтой сæ 48 проценты, паддзахадон программæтæн та – сæ 51,4 проценты.
Æмбырды ма ныхас цыд æндæр ахсджиаг фарстатыл дæр.
ХЪОЙБАЙТЫ Галинæ
