РЦИ-Аланийы Сæргълæууæг Сергей МЕНЯЙЛОЙÆН Мæскуыйы кусæг фембæлд уыд Уæрæсейы Хицауады Сæрдары хæдивæг Дмитрий ЧЕРНЫШЕНКОИМÆ. Ныхасы архайджытæ æрдзырдтой Цæгат Ирыстоны ахуырады, наукæйы, спорты, туризм æмæ иннæ къабæзты дарддæры райрæзтыл, фæсивæдон политикæйы уагæвæрдтæ æххæст кæныныл.
Уæрæсейаг регионты социалон-экономикон уавæрыл дзургæйæ, Дмитрий Чернышенко куыд фæбæрæг кодта, афтæмæй федералон Хицауад фыццаградон æргом здахы мидбæстон туризмы райрæзтмæ.
– Уыцы къабазы хорз авналæнтæ ис Цæгат Ирыстонæн. Республикæйы хæдбындур культурæ æмæ йæ алæмæты æрдз цымыдисаг сты туристтæ æмæ иннæ фæлладуадзæг адæмæн. Ацы къабазы инфраструктурæ нывылдæр кæныны хъуыдда-
джы регион уæрæх пайда кæны национ проект «Туризм æмæ уазæгуарзондзинад»-ы фадæттæй. Афтæ, туристты удæнцойæн модулон чысыл хæдзæрттæ æмæ фысымуæттæ саразыны тыххæй республикæ федералон ведомствæтæм цы курдиæттæ балæвæрдта, уыдоны фæдыл æвæрццæг уынаффæтæ рахастой. Ныр уыцы нысанæн республикæйæн 2025-2027 азты дихгонд æрцæудзæн 1 миллиард сомы бæрц. Ахæм фæткы бындурыл куыст цæуы туристон инфраструктурæйы иннæ объектты нывыладыл дæр, – бафиппайдта Хицауады Сæрдары хæдивæг.
Йæ дарддæры раныхасы Дмитрий Чернышенко куыд фæбæрæг кодта, афтæмæй зæрдыл дарын хъæуы, Президент Владимир Путин физикон культурæ æмæ спорты къабазы дарддæры райрæзтæн цы мадзæлттæ снысан кодта, уыдон дæр. Президенты амынддзинæдтæй иуы нысан æвæрд цæуы, цæмæй 2030 азмæ Уæрæсейы цæрджыты 70 проценты бæрц æмхиц уой физикон культурæмæ, архайой спортивон секциты. Уыцы æууæл та, Хицауады Сæрдары хæдивæджы ныхасмæ гæсгæ, домы, цæмæй регионтæ федералон центры æххуысæй кусой спортивон инфраструктурæйы дарддæры райрæзтыл.
Фембæлды архайджытæ уыдысты æмхъуыды, национ проект «Фæсивæд æмæ сывæллæттæ» Цæгат Ирыстоны ахуырад æмæ наукæйы дарддæры рæзтæн ахъаз кæй у, ууыл дæр. Афтæ, амынд проекты фæлгæты регионы сараздзысты цалдæр ног
ахуырадон кусæндоны. Федералон проект «Профессионалитет»-ы уагæвæрдмæ гæсгæ та республикæйы фæзындысты æртæ ахуырадон кластеры – «Педагогикæ», «Барадон къабаз æмæ разамынды бындуртæ» æмæ «Туризм æмæ лæггæдты къабаз». Федералон программæ «Регион – æрыгæттæн»-ы фæлгæты та æххæстгонд æрцыд Фæсивæды республикон галуаны бындурон цалцæджы фыццаг хай…
– Республикæйы социалон-экономикон политикæйы сæйрагдæр нысантæй иу у ахуырады къабазы дарддæры райрæзт. Регионалон бюджетæн йе ’ртыккæгæм хай комкоммæ баст у ахуырад æмæ рæзгæ фæлтæры хъомылады фарстатимæ. Уыцы нысантыл куыстæн хорз ахъаз уыдысты национ проект «Ахуырад»-ы уаг-
æвæрдтæ дæр. Зæгъæм, æрмæст 2024 азы амынд проекты фæлгæты республикæйæн федералон бюджетæй дихгонд æрцыд 4,6 миллиард сомы бæрц. Ахæм аудынад æмæ æххуысы æндæр мадзæлтты тыххæй федералон Хицауадæй уæлдай бузныг стæм, – загъта Сергей Меняйло.
РЦИ-Аланийы
Сæргълæууæг æмæ
Хицауады пресс-службæ
