Цæгат Ирыстоны цæрджытæ ивгъуыд сабаты радон хатт сбæрæг кодтой нæ удварны ахсджиагдæр бæрæгбæттæй иу – Задæлескы Нанайы бон. Æрæфы районы Задæлес-кы хъæумæ уыцы бон цы бирæ адæм æрбамбырд, уыдонæн бæрæгбоны арфæ ракодта Цæгат Ирыстоны Сæргълæууæг Сергей МЕНЯЙЛО.
Нæ адæмы историйы æнустæм баззад, XIV æнусы, монгойлаг-тæтæйраг æфсæдты тугуарæн æрбабырсты рæстæг хуымæтæг алайнаг сылгоймаг цы уды фидар æмæ сгуыхтдзинад равдыста, уый. Фыдæлтыккон таурæгъмæ гæсгæ, нæ адæм знаджы къухæй цагъды куы фесты, уæд уыцы сылгоймаг æрбамбырд кодта, чи ма аирвæзт, уыцы сидзæр сывæллæтты æмæ сæ, сусæг лæгæты бамбæхсгæйæ, фæхъомыл кодта. Афтæмæй уыцы сылгоймаг йæ адæмы бынсæфтæй фервæзын кодта. Задæлескы Нанайы ном баззад таурæгътæ æмæ зарджыты, ссис йæ адæмыл æнувыддзинад æмæ хъæбатырдзинады цæвиттон…
Уыцы рагон цауты кадæн мадзæлттæм сæмбæлдысты алы кæмтты цæрджытæ æмæ республикæйы уазджытæ, æхсæнадон змæлд «Аланты Ныхас»-ы уæнгтæ, Цæгат Ирыстоны Хицауад æмæ Парламенты минæвæрттæ…
Бæрæгбоны архайджытæн, зæрдиаг салам ратгæйæ, Сергей Меняйло куыд бафиппайдта, афтæмæй цыфыддæр знаджы æрбабырсты рæстæг уыцы хъæбатыр сылгоймаг цы удуæлдайдзинад равдыста, уый ирон адæмы историйы арф фæд ныууагъта.
– Кæд бирæ æнустæ рацыд, уæддæр адæмæй рох нæу Нана – афтæ йæ хуыдтой, кæй аирвæзын кодта, уыцы сабитæ, афтæ йæ хонæм мах дæр. Задæлескы Нанайы бон нæ адæмæн у, уæлдай ахадындзинад кæмæн ис, ахæм бæрæгбон. Ацы бон ма нын иу хатт нæ зæрдыл лæууын кæны, сылгоймаджы фарн куыд æгæрон у, мады удуæлдайдзинад куыд æвидигæ у, уый. Бæрæгбоны хорзæх уæ уæд, мæ зынаргъ æмзæххонтæ! Æнæниздзинад æмæ сабыр цардæй хайджын ут, – загъта Сергей Меняйло.
Зындгонд куыд у, афтæмæй, РЦИ-Аланийы Сæргълæууæджы уынаффæйæ, 2023 азы Задæлес-
кы Нанайы бон хаст æрцыд республикæйы паддзахадон бæрæгбæтты къæлиндармæ. Бæрæггонд цæуы августы фыццаг сабаты.
КАЛМАНТЫ Аслан
