Федералон программæ «Хистæр фæлтæр» æмæ национ проект «Бинонтæ»-мæ гæсгæ Горæтгæрон районы Адæмæн социалон лæггæдты комплексон центры кусджытæ бацæттæ кодтой зæрдæмæдзæугæ фембæлд. Центры лæггæдтæй чи пайда кæны, уыцы хистæртæ цымыдисаг балцы ацыдысты чингуытæ æмæ зонындзинæдты дунемæ. Зæрдиагæй сыл сæмбæлд Сунжæйы хъæууон библиотекæ. Кадджын уазджытæн, сæ чиныгкæсджытæн библиотекæйы кусæг Косты Анаидæ радзырдта чиныгдоны историйы тыххæй, сæ фонды цас æмæ цавæр алыхуызон чингуытæ ис, сæйрагдæр та, – нырыккон библиотекæйы алы кары адæмæн цы ног гæнæнтæ ис, уый тыххæй.
Чингуыты къæбицы алы уазæгæн дæр раттой сæрмагонд билет, уыцы æвдисæндар фадат дæтты, нырæй фæстæмæ сæ бон кæй у чингуытæ æмæ газеттæ хæдзармæ исын, стæй æппæт бæрæгбæтты архайын.
Чингуыты дуне бабæрæг кæнгæйæ, сæ æрвылбоны тыхстытæ айрох кæнгæйæ, чингуыты къæбицы рæдау æфсинты аудындзинадæй хистæртæ райстой стыр æхсызгондзинад æмæ зæрдиаг бузныг загътой фысымтæн.
Бирæтæ ныфс бавæрдтой, арæхдæр кæй цæудзысты библиотекæмæ, уымæн æмæ чиныг адæймаджы миддуне хъæздыг кæны.
Нæ уацхæссæг
