РЦИ-Аланийы Хицауады радон æмбырд амыдта йæ Сæрдар Дзанайты Барис. Рæгъмæ цы фарстатæ рахастой, уыдон иууылдæр баст сты нæ республикæйы социалон-экономикон рæзтимæ.
Хицауады уæнгтæ ивддзинад бахастой республикон закъонмæ, ныхас дзы цæуы социалон объекттæ æмæ егъау инвестпроекттæн зæххы хæйттæ арендæйы æнæ базар кæнынæй дæттыныл. Ацы хъæппæрис рахаста РЦИ-Аланийы Экономикон рæзты министрад. Закъоны домæнтæм гæсгæ, ахæм социалон объекттæ хъуамæ æххæст кæной нæ республикæйы алывæрсыг райрæзты стратеги æмæ программæты домæнтæ æмæ нысантæ. Уымæй уæлдай, фадат дæттой ног куысты бынæттæ аразынæн, æфтиæгтæ хæссой бюджетмæ.
Хицауады Сæрдар куыд бафиппайдта, афтæмæй республикæйы Сæргълæууæг Сергей Меняйлойы уынаффæйæ инвесторты раз сæвæрдтой уæлæмхасæн домæнтæ. Закъонмæ ивддзинæдтæ фадат дæттынц социалон-экономикон фарстатæ алыг кæнынæн, ног куысты бынæттæ аразынæн æмæ хъалонты нымæц фæфылдæр кæнынæн.
РЦИ-Аланийы Промышленность æмæ инвестициты министрад фæндон бахаста æрмдæсныты куыстытæн аргъгæнæг экспертон советы архайды фæтк сфидар кæнын. Советы уæнгтæн бар уыдзæн æрмадзты архайдæн аргъ кæнын.
– Цæгат Ирыстон йæ культурæ æмæ историйæ у хъæздыг. Национ хуызимæ дзаумæттæ чи кæны, уыдонæн сæ архайд уыдзæн æххуыс, – фæнысан кодта Дзанайы-фырт.
Хицауады уæнгтæ æркастысты æмæ сразы сты ноджы ма иу ахсджиаг фарстаимæ – горæттæ æмæ хъæуты уынгты фæндæгты техникон уавæрмæ чи кæсдзæн, ахæм цæстдарæг къамис саразынимæ. Йæ хæс уыдзæн æппæт информаци æмбырд кæнын. Куыстытæ цæудзысты национ проект «Инфраструктурæ цардæн»-ы бындурыл.
Хицауады Сæрдары хъуыдымæ гæсгæ, хъæууон фæндæгты уавæр ныртæккæ тынг ахсджиаг у. Арæзт æмæ цалцæггонд цæуынц бирæ автомобилон фæндæгтæ, фылдæр æргом аздахын хъæуы, хæххон, туристон, фæлладуадзæн бынæттæм чи хæццæ кæны, уыдонмæ.
Нырæй фæстæмæ гимназ «Диалог» хæсдзæн Уæрæсейы Хъæбатыр Тыбылаты Мараты ном. Сæрмагонд æфсæддон операцийы архайгæйæ, æрыгон лæппу фæмард, йе ‘фсæддон хæс æххæст кæнгæйæ. Æмбырды архайджытæ сразы сты РЦИ-Аланийы Культурæйы министрады ацы хъæппæрисимæ.
– Æнæмæнг, хъæбатыры ном рох нæ уыдзæн, рæзгæ фæлтæры патриотон хъомылад æмæ историон æцæгдзинад бахъахъхъæнынæн уыдзæн ахъаз, – загъта Дзанайты Барис.
Хицауады уæнгты уынаффæйæ Бæхты спортивон скъола хæсдзæн Уæрæсейы сгуыхт тренер Хъыбызты Фердинанды ном.
Сæрдыгон фæлладуадзæн рæстæг лæвар балцæгтæ райсдзысты cæрмагонд æфсæддон операцийы архайджыты, стæй, Сирийы, Курскы, Белгород æмæ Брянскы йе ‘фсæддон хæс чи æххæст кæны, уыдоны сывæллæттæ. Æдæппæтæй, ацы аз ахæм гæнæн уыдзæн 36 мин сывæллонæн. Ацы хъуыддагæн радих кодтой 230 милуан сомы.
РЦИ-Аланийы Фæсивæды комитеты сæрдар Джусойты Руслан фехъусын кодта нæ республикæйы Хицауады премийы лауреатты нæмттæ. Уыдон сты – Цæгат Ирыстоны фæсивæдон æхсæнадон организаци «Ног фæлтæр»-ы сæрдары хæдивæг Бæззаты Алан, Цæгат Ирыстоны Базарадон-экономикон колледжы ирон æвзаг æмæ литературæйы ахуыргæнæг Дзусты Бэлæ, фæсивæды æфсæддон-патриотон хъомылады центры директоры хæдивæг Тъехты Эльбрус.
Абайты Васойы номыл стипенди райсыны фадат нырæй фæстæмæ уыдзæн æппæт уæлдæр ахуыргæнæндæтты, наукон-иртасæн институты, наукон центрты ахуырдзаутæ æмæ кусджытæн. Номхыгъд фæуæрæхдæр кодтой Хицауады уæнгтæ сæ уынаффæйæ.
– Национ культурæ æмæ наукæйы райрæзтæн хорз æххуыс у. Ныр 20 азæй фылдæр сæдæгай æрыгон ахуыргæндтæ райстой ацы стипенди, – фæбæрæг кодта Хицауады Сæрдар.
Гугкаты Жаннæ,
къам систа Татьянæ Шеходанова
