Бирæ ног æмæ цымыдисаг хабæрттимæ базонгæ вæййынц, лагерь «Патриот-2025»-мæ чи ’рбацæуы, уыцы æвзонг фæсивæд. Уазæгуаты сæм вæййынц мидхъуыддæгты алы хайæдты кусджытæ, Мидæфсæдты ветеранты советы уæнгтæ, стæй алыхуызон министрадты, ведомствæты, æхсæнадон, фæсивæдон æмæ дины организациты минæвæрттæ.
Мæнæ та хæрзæрæджы дæр лагеры уазджытæ уыдысты Цæгат Ирыстоны экспертон-криминалистон центры специалисттæ. Уыдон базонгæ кодтой сывæллæтты сæ куысты æууæлтимæ, уыцы ахсджиаг службæйы хицæндзинæдтимæ. Уæлдай фылдæр æргом аздæхтой экспертизæйы алы хуызтæм, радзырдтой, куыд æмæ цавæр уавæрты йæ фæкæнынц, уыдæтты тыххæй. Æппæтæй тынгдæр дисы та сывæллæтты бафтыдта, «Криминалисты къопп» кæй хонынц, уый. Уый фæстæ сæхæдæг дæр фæлвæрдтой дактилоскопийы экспертизæ скæнын, ома, сæрмагонд дзаумæтты фæрцы æнгуылдзты нывтæ сисын.
Тынг фæцыд сæ зæрдæмæ лагеры æвзонг фысымтæн уыцы фембæлд, сæ уазджытæн уый фæдыл ракодтой зæрдиаг арфæтæ.
РЦИ-Аланийы Мидхъуыддæгты министрады пресс-службæ
