Дзæуджыхъæуы уынгтæ æмæ микрорайонты цы чысыл киосктæ æмæ æндæр ахæм рæстæгмæ базарадон объекттæ фæзыны, уыдоны æддаг бакаст æмæ бынатæвæрдмæ уыдзæн карздæр цæстдард горæты администрацийы ’рдыгæй.
Уый тыххæй фехъусын кодтой Цæгат Ирыстоны сæйраг горæты администрацийы пресс-службæйы.
Муниципалитеты бæрнон кусджыты ныхасмæ гæсгæ, ныронг ахæм рæстæгмæ базарадон объектты æддаг хуыз æмæ бынат уыдысты амалхъомтæн сæхи бæрны. Фæлæ ныр йæ тыхы бацыд бынтон æндæр уагæвæрд. Администрацийы профилон дæлхайæдты фæндæтты бындурыл рагагъоммæ бæрæггонд æрцыдысты, базарадон киосктæ кæм сæвæрæн ис, уыцы бынæттæ. Уыимæ, сæрмагонд æргом здæхт цæу-
дзæн ахæм объектты æддаг бакастмæ, ома, хъуамæ уой иухуызон дизайны фæлгонцгонд.
«Рæстæгмæ базарадон объект сæвæрынвæнд чи скæна, уыдонæн уыдзæн сæ киосктæ æрмæстдæр бæлвырд бынæтты байгом кæныны фадат», — радзырдтой горæты администрацийы амалхъомад æмæ инвестицион архайды управленийы.
Уыимæ, администрацийы минæвары ныхасмæ гæсгæ, дарддæр куыст цæуы, горæты уынгты йæ рæстæджы æнæзакъонæй цы базарадон объекттæ æвæрд æрцыд, уыдон айсыныл. Зæгъæм, фæстаг къуырийы дæргъы райхæлдтой 5 ахæм базарадон киоскы.
Дмитрий Астахов
