Цæгат Ирыстоны, Хетæгкаты Къостайы номыл университеты ректор Огъуаты Алан æмæ «Цæгат Кавказы федералон зылды Туризмы къабазы рæзты ассоциаци»-йы разамонæг Æбиты Валери бафыстой, туризмы куыс-
ты кадртæ кæй нæ фаг кæны, уыцы ахсджиаг фарстатæ банывыл кæныны тыххæй æмгуыстады бадзырд.
Ассоциацийы архайд арæзт у регионы туризмы къабазæн специалисттæ цæттæ кæнын, куысты бынæттæ сын ссарын, уæлдæр ахуырадон скъолатæ æмæ куыстдæттæг организацитимæ сын æмныхасы бастдзинады таг саразын. Уыдонæй ЦИПУ сси фыццаг университет, Ассоциациимæ бадзырд чи бафыста.
Огъуаты Алан арфæ ракодта Акционерон æхсæнад «Кавказ.РФ»-ы генералон директоры хæдивæг Кебекты Тимурæн, йæ ахадгæ хъæппæрис æмæ фидæны æнтыстджын æмгуыстады тыххæй. Огъуайы-фырт ма фæнысан кодта, туристон инфраструктурæйæн æнæ дæсны специалисттæй рæзæн кæй нæй, уый
дæр.
– Ахсджиаг хъуыддаг у инвестортæ æмæ куыстдæттæг организациты домæнтæ ахуырадон организациты гæнæнтимæ баиу кæнын. Университеты хæстæ сты ахуырадон программæтæ афтæ аразын, цæмæй биноныгдæр нымад цæуой уæлдæр амынд къабазы домæнтæ æмæ ифтонг кæной кадрты хæрзхъæд цæттæдзинадæй, – загъта ЦИПУ-йы ректор.
Ассоциацийы разамонæг Æбиты Валери куыд фæбæрæг кодта, афтæмæй организацийы нысан у, туризмы рæзт æмæ сервисыл канд Цæгат Ирыстон æмæ Цæгат Кавказы нæ, фæлæ Уæрæсейы Федерацийы дæр архайын.
– Мах æмгуыст кæнæм, туризмы къабазмæ стыр æвæрæн, инфраструктурæ æмæ ног куысты бынæттæ чи хæссы, уыцы инвестортимæ. Уымæн нын у ахсджиаг университеттæ æмæ колледжтимæ æмархайд дæр. Уыцы æмгуыстады фæрцы рауагъдонтæн фадат уыдзæн фæллойы базарады сæхи «ссарынæн», – загъта Æбиты Валери.
Саутæты Тамилæ
