Абон Цхинвалы райдыдтой республикæйы 35 азы боны фæдыл бæрæгбоны мадзæлттæ. Уыцы рæстæгмæ паддзахад уæндон къахдзæфтæ акодта царды Уæрæсейы æххуысæй. Нысанмæарæзт программæ 2026- 2030 азтæм республикæйы цæрджытæн дæтты ныфс, йæ рæзт дарддæр дæр хъомысджын кæй уыдзæн.
Абон спорткомплекс «Олимп»-ы байгом 1-æм Æппæтдунеон инвестицион форум «Южная Осетия – горизонты событий». Хицаудзинады оргæнтæ, паддзахадон корпорацитæ æмæ бизнесы иумæйаг архайды фæрцы ацы цалдæр боны куыст фæахъаз уыдзæн республикæйы инвестицион рæзт æмæ ног пайдахæссæг бадзырдтæ бафыссынæн. Фондз азмæ нысанмæарæзт программæйы проектмæ гæсгæ Уæрæсе Хуссар Ирыстонæн радих кæндзæн 43 миллиард сомы. Бæлвырд у, цæуыл æрцæудзысты хардзгонд, уый дæр. Фыццаджыдæр, уæрæсейаг банктæй инвестортæн льготæйы уагыл лæвæрд цæудзысты æхцайы фæрæзтæ. Паддзахадон æххуыс цæудзæн чысыл æмæ рæстæмбис бизнесы рæзтæн. Хуссар Ирыстоны граждæнтæн уæрæсейаг граждайнад хуымæтæгдæр уагыл дæттыны тыххæй уынаффæ бафыста Президент Владимир Путин.
Æфсымæрон паддзахад архайы республикæйы зæххы фæзуат æмæ йæ арæнтæ хъахъхъæнын, стæй йæ æдасдзинадыл. Ахъаз у æфсæддон тыхтæн хæстæрмæг æмæ материалон-техникон æххуыс кæнынæй. Республикæйы цæрджыты сабыр цард хъахъхъæнынæн стыр ахъаз сты, йæ зæххыл цы 4-æм гвардион æфсæддон базæ æмæ Уæрæсейы Æдасдзинады Федералон службæйы арæнхъахъхъæнæн управлени сты, уыдон. Хуссар Ирыстоны цалдæр районы æмарæн кæнынц Гуырдзыстонимæ. Йæ фæзуатмæ гæсгæ Ленингоры район Дзауы фæстæ ахсы дыккаг бынат.
– Иуæндæс хъæуы сты районы администрацийы бæрны, йæ цæрджыты нымæц – 500 адæймаджы. Æртын фондз азмæ дзы бирæ хорз хъуыддæгтæ æрцыд арæзт царды алы къабæзты. Цæрæнуатон-коммуналон хæдзарад базылдысты дондзæуæнтæм. Æрдзон газ нæма ис районы хъæуты, зæрдæ дарæм, программæмæ гæсгæ нæм тагъд рæстæджы Уæрæсейæ кæй æрцæудзæн уагъд, уымæй, – зæгъы Ленингоры районы администрацийы сæргълæууæг Уалыты Муртаз.
Æнæкъуылымпыйæ сæм лæвæрд цæуы электрон рухс, бындуронæй цалцæггонд æрцыдысты районы фараст скъолайы. Культурæйы хæдзæрттæ æппæт хъæуты дæр бындуронæй сцалцæг кодтой, æнтыстджынæй дзы кусынц алыхуызон хихъæппæрисадон къордтæ. Уæрæсейы Президенты уынаффæмæ гæсгæ, Уæлахизы 80 азы кадæн, Фыдыбæстæйы Стыр хæсты мемориалон цыртдзæвæнтæ кæм ис, уыцы хъæуты сæ базилынмæ администрацитæн радих кодтой фæйнæ милуан сомы. Æрмæст Ленингоры мемориалон цыртдзæвæнтæ ис иуæндæс.
Гуырдзыстонимæ æмарæн Раздæхæны администрацийы бæрны цы фондз хъæуы ис, уыдон хастой гуырдзиаг нæмттæ. Ивд æрцыдысты, æмæ сын раттой ногтæ: Тыджытæ, Дæлхъæу, Салбер, Дзуглæууæн. Уадзæн дыууæ пункты сæрты бафыст арæны сæрты ахизыны бар ис æрмæст ацы хъæутæй рацæуæг адæймæгтæн. Уымæй пайда кæнынц ардыгæй ацæуæг адæймæгтæ æрвылмæй дæр, йе ссæдзæм бонæй мæйы фæудмæ, зæгъгæ, нын бамбарын кодта Раздæхæны администрацийы сæргълæууæг Аулохты Таймураз.
Æрмæст Уæрæсейы æххуысыл нæ дарынц сæ зæрдæ Хуссар Ирыстоны. Гом цæуынц ног кусæн бынæттæ чысыл æмæ рæстæмбис амалхъомады, хъæууон хæдзарад æмæ туризмы рæзтимæ. Дыууæты ‘хсæн æнтыстджынæй кусынц 140 бадзырды. Хъæууон хæдзарады министрады бæрæггæнæнтæм гæсгæ, ацы азы хуызæн бæркадджын тыллæг никуыуал систой зæхкусджытæ. Республикæйы донивылдтыты ныхмæ фидар кæнынц цæугæдæтты былгæрæттæ, уыдонимæ Ленингоры районы Ксаны цæугæдон дæр.
Республикæйы бонмæ Хуссар Ирыстоны Национ банк рауагъта зæрдылдарæн æхца, йæ тираж у 700 экземпляры, йæ аргъ – 35 зæрины. Бæрæгбоны фæлгæты Цхинвалы 19 сентябры кадджын уавæры байгом кæндзысты Ахмат Кадыровы номыл Аивæдты скъола. Уыцы бон театралон фæзы сфæйлаудзæн Хуссар Ирыстоны «удæгас тырыса», флешмоб саразджытæ – хореографион скъола-студийы хъомылгæнинæгтæ. Фæзы азардзысты оперæйы дæсны Джиоты Вероникæ, Бекъойты Вано æмæ иннæ хъуыстгонд зарæггæнджытæ. Кафт æмæ зарды ансамбльтæ «Симд» æмæ «Исламей»-ы иумæйаг бæрæгбоны концерт ацæудзæн Хетæгкаты Къостайы номыл Ирон драмон театры сценæйыл. 20-æм сентябры та Цхинвалы сæйраг фæзы ацæудзæн æфсæддон парад, стæй бæрæгбоны концерт.
ХУЫБИАТЫ Ларисæ
