Цæгат Кавказы туризмы райрæзты инвестицион гæнæнты тыххæй ныхас цыди ТАСС-ы информацион центры арæзт пресс-конференцийы. Мадзал арæзт æрцыд телеграфон агентады информацион-æмбарынгæнæн мультимедион портал «Это Кавказ»-ы 10 азы юбилейы кадæн. Видеобастдзинады руаджы дзы архайдта РЦИ-Аланийы Хицауады Сæрдар Дзанайты Барис.
Пресс-конференцийы ма архайдтой ТАСС-ы генералон директор Андрей Кондрашов, Уæрæсейы Федерацийы экономикон рæзты министры хæдивæг Сергей Назаров, Уæрæсейы Федерацийы Хицауады Сæрдары хæдивæджы æххуысгæнæг Ольгæ Голант. Регионалон информацион центры уыдис Цæгат Кавказы федералон зылды Уæрæсейы Федерацийы Æххæстбарджын минæвары хæдивæг Владимир Надыкто æмæ радзырдта федералон зылды экономикон æмæ туризмы рæзты тыххæй.
Цæгат Ирыстоны Сæргълæууæг Сергей Меняйло æмæ йæхи номæй Дзанайты Барис портал «Это Кавказ»-ы коллективæн зæрдиаг арфæ ракодта сæ юбилейы фæдыл.
Дыууæ хатты чи сырæзыд, уыцы туристон гуылфæн (поток) къухы куыдæй бафтыд, зæгъгæ, журналистты ахæм фарстæн дзуапп дæтгæйæ, премьер-министр фæбæрæг кодта, ацы аз дæр республикæмæ фылдæр туристтæ кæй цæуы.
– Нæ регион тынг зæрдæмæдзæугæ у. Фыццаджыдæр, Цæгат Ирыстон туристтæн цымыдисаг у йæ хъæздыг культурæ, истори, традицитæ, æрдзæй. Мах аразæм æппæт хъæугæ инфраструктурæ. Разæнгардæй арæзт цæуынц нырыккон фысымуатон комплекстæ нæ республикæйы æппæт районты, уазджытæн дзы ис хъæугæ уавæртæ. Къæпхæнгай ног кæнæм нæ бирæ культурон бынты объекттæ. Республикæйы аразæм уазджытæн цымыдисаг тæлмытæ, уый тыххæй та пайда кæнæм федералон æмæ регионалон æххуысы мадзæлттæй, архайæм гранттæ райсыны конкурстæ æмæ программæты. Уый руаджы саразæм ног бынæттæ туристтæн. Инвестортæн сæ профилон проекттæ царды уадзын æмæ сæ бизнес фæуæрæхдæр кæнынæн дæттæм фæзуæттæ. Æппæт цымыдисаг бынæттæм саразæм туристон маршруттæ æмæ къахвæндæгтæ. Ис нæм, уазджытæн цы бавдисæм, уый. Егъау куыст цæуы сæ алфамбылай инфраструктурæйыл дæр – сæрæнæй аразæм æмæ цалцæг кæнæм фæндæгтæ. Хæххон районты нæм ныртæккæ ис хорз фæндаггон инфраструктурæ, уый та у бынæттон цæрджытæ æмæ уазджыты хæрзвадат æмæ æдасдзинады домæн, – загъта Хицауады Сæрдар.
Дзанайты Барис дызæрдыг нæ кæны, иу хатт Цæгат Ирыстонмæ чи ‘рбацыд, уый ма иннæ хатт дæр нæ республикæ кæй бабæрæг кæндзæн. Ардæм сæ æлвасынц нæ цымыдисаг культурæ, историон бынæттæ, нæ национ хæрзад хæринæгтæ, цæрынæн æмбæлгæ уавæртæ.
– Республикæйы ис бирæ гæнæнтæ туризмы рæзтæн. Ис нæм хорз бальнеологи, не ‘ргом аздахынмæ хъавæм санаторон-курортон æнæниз фидар кæныны хъуыддагмæ, ныридæгæн ыл куыст цæуы. Уазджытæ кæм æрбынат кæнынц, уыцы агъуыстытæм лæмбынæг кæсæм, аттестаци кæнæм гидтæн. Абоны онг нæм ахæм специалисттæ ис 160, – загъта премьер-министр.
Дзанайты Барис ма фæбæрæг кодта, Цæгат Ирыстоны улæфæн бынæтты æдасдзинад æмæ хæрзвадæттыл дарддæр дæр куыст кæй цæуы.
ГАПБАТЫ Алетæ
