РЦИ-Аланийы Хицауады Сæрдар ДЗАНАЙТЫ Барисы разамындæй уыд республикæйы Хицауады радон аппаратон æмбырд. Архайдтой дзы министрадтæ æмæ ведомствæты разамонджытæ, районты сæргълæуджытæ. Ныхас кодтой, республикæйы экономикон уавæрыл, национ æмæ паддзахадон проекттæ куыд æххæстгонд цæуынц, ууыл.
Хицауады Сæрдары хæдивæг Икъаты Русланбег йæ раныхасы фехъусын кодта республикæйы оперативон уавæр.
– Цæгат Ирыстоны æппæт сæрмагонд службæтæ дæр архайынц бæрзонд цæттæдзинады уавæрты. Транспорты æппæт хуызтæн дæр фадат ис Арвыком æмæ Транскамы фæндæгтыл ацæуынæн. Республикæйы фæндæгтыл Арвыкомы фæндагыл ацæуынмæ æнхъæлмæ кæсынц 1200 автотранспортон иуæджы, уыдонæй 660 – сæрмагонд бынæтты. Ивгъуыд къуырийы дæргъы Уæрæсе æмæ Гуырдзыстоны арæныл дыууæрдæм ахызтысты 24,6 мин автотранспортон иуæджы æмæ 62 мин адæймагæй фылдæр. Республикæйы фæндæгтыл æрцыд 111 фæндаггон фыдбылызы. Хъыгдард дзы баййæфтой 22 адæйма-джы, – загъта Икъайы-фырт.
Цæгат Ирыстоны дарддæр дæр арæзт цæуынц гриппы ныхмæ мадзæлттæ. Уый тыххæй фехъусын кодта «Роспотребнадзор»-ы республикон хайады разамонæг Тыбылты Алан.
– Медицинон уагдæттæм гриппы тыххæй æххуысмæ чи бадзырдта, уыдоны нымæц ивгъуыд къуыри сырæзт 14 проценты. Уыимæ, эпидемион бæрæггæнæнтæ сты нывыл. Ног коронавирусон инфекцийæ фæрынчын 16 адæймаджы, – загъта ведомствæйы разамонæг.
Республикæйы ахуырад æмæ наукæйы министр Алыбегты Эллæйы ныхасмæ гæсгæ, ныртæккæ рынчын сты скъоладзауты 10 проценты æмæ рæвдауæндæтты хъомылгæнинæгты 16 проценты. Карантины æхгæд чи æрцыд, ахæм ахуырадон уагдæттæ ныртæккæ регионы нæй.
Дзанайты Барис республикæйы Культурæйы министрадæн бахæс кодта районты Культурæйы хæдзæрттæ бабæрæг кæнын, æмæ, ифтонгадæй цы
хъуагдзинæдтæ æвзарынц, уый æмæ æндæр лыггæнинаг фарстатæ сбæрæг кæнын.
Транспортон комитеты хъусынгæнинагмæ гæсгæ, бæрæг маршруттыл цы æхсæнадон транспорт цæуы, уыдоны нымæц у, цас æмбæлы, уый бæрц. Алы хъуыддагæй дæр сæм цæуы бæлвырд цæстдард.
РЦИ-Аланийы финансты министры хæстæ рæстæгмæ æххæстгæнæг Оксанæ Карова куыд фæбæрæг кодта, уымæ гæсгæ республикæйы бюджет æххæстгонд æрцыд 68,7 процентæй, паддзахадон программæтæ та – 74 процентæй.
Хицауады Сæрдар фæбæрæг кодта, Æрæфы æмæ Дыгуры районты фæндаггон куыстытæ афонæй фæстæдæр кæй баззадысты, уый.
Дзанайты Барис министртæ æмæ ведомствæты разамонджытæн бахæс кодта, национ æмæ паддзахадон проекттæ куыд æххæстгонд цæуынц, уымæ фылдæр æргом аздахын.
Æмбырды ма ныхас цыд æндæр ахсджиаг фарстатыл дæр.
ХЪОЙБАЙТЫ Галинæ
