А-дыууæ боны Цæгат Ирыстоны Хетæгкаты Къостайы номыл паддзахадон университеты йæ куыст кодта Цæгат Кавказ æмæ Хуссар Ирыстоны фæсивæды наукон форум. Уыцы уæрæх æмбырд арæзт æрцыд университеты 105 азы юбилейы кадæн.
Форуммæ саккаг кодтой паддзахадон хицаудзинады оргæнты бæрнон кусджытæ, ахуыргæндтæ, эксперттæ, амалхъомады структурæтæ æмæ æхсæнадон иугæндты минæвæрттæ.
Æмбырды сæйрагдæр архайджытæ та систы æрыгон ахуыргæндтæ-иртасджытæ æмæ уæлдæр ахуыргæнæндæтты студенттæ Цæгат Кавказы федералон зылд æмæ Хуссар Ирыстонæй. Уыдонæн фадат уыд бæстон æрдзурын æрдззонæн æмæ гуманитарон наукæты абоны уавæр æмæ дарддæры райрæзтыл, æрыгæттæ рæгъмæ рахастой сæ иртасæн куыстытæ æмæ проекттæ, базонгæ сты кæрæдзийы фæлтæрддзинадимæ, фæнысан кодтой дарддæры æмархайды фæндæгтæ…
Форумы пленарон æмбырды кадджын уазджытæ уыдысты Цæгат Ирыс-
тоны экономикон рæзты министры фыццаг хæдивæг Олег Быкадоров, республикæйы ахуырад æмæ наукæйы министры хæдивæг Габеты Вадим, Дзæуджыхъæуы бынæттон хиуынаффæйады администрацийы сæргълæууæджы хæдивæг Ходы Мæдинæ, РЦИ-Аланийы Фæсивæдон парламенты сæрдар Куыдзиаты Азæмæт æмæ иннæтæ.
ЦИПУ-йы ректор Огъуаты Аланы номæй æмбырды архайджытæн арфæ ракодта æмæ йæ фæндиæгтæ загъта наукон фарстаты проректор Тенгиз Тиникашвили. Форумы æрыгон архайджытæм дзургæйæ, проректор загъта: «Мах æппæт фадæттæ дæр аразæм, цæмæй студенттæм куыд гæнæн ис, афтæ раздæр гуыра цымыдисдзинад
наукон-иртасæн куыстмæ. Æрыгон ахуыргæндтæм, ног фæлтæртæм хæстæгдæр фидæны кæсы раззагдæр технологитыл куыст, наукæйы дарддæры размæцыдыл архайд».
Пленарон æмбырды докладтæ скодтой Уæрæсейы Медикон-техникон наукæты академийы уæнг-уацхæссæг, медицинон наукæты доктор Денис Иванов, ЦИПУ-йы бындурон экологон раиртæстыты лабораторийы хистæр наукон кусæг Дзампаты Жаннæ, химион наукæты кандидат Петракис Чаликиди, университеты физикон-техникон факультеты студент Елойты Даниэль æмæ иннæтæ.
Дарддæр форум йæ куыст кодта секциты æмвæзадыл (æдæппæт уыдысты фондз – наукон-технологон æмæ социалон-культурон политикæйы фарстатыл, Уæрæсейы фæзуатон райрæзтыл, æрхъуыдыгонд интеллекты фадæттæй пайда кæныныл, медицинæйы ногдзинæдтыл æмæ афтæ дарддæр).
Знон та æмбырды архайджытæ бахыгътой сæ дыууæ боны куысты бæрæггæнæнтæ, фæбæрæг кодтой хуыздæр докладтæ æмæ наукон-практикон проекттæ, сфидар кодтой сæ форумы уынаффæтæ… Уыимæ, форумы æрмæджытæ мыхуыргонд æрцæудзысты наукон рауагъдты.
Ахæм фæсивæдон форум саразыны фадат фæзынд, ЦИПУ Уæрæсейы Наукæ æмæ уæлдæр ахуырады министрады грантты конкурсы уæлахиздзаутæй иу кæй сси, уый фæрцы. Гранты комкоммæ нысаниуæг у студентты наукон иугæндты райрæзтæн ахъаз кæнын.
Дмитрий АСТАХОВ
