Хæрзконд, зæрдæмæдзæугæ сылгоймагмæ уайтагъд фæкомкоммæ вæййы адæймаг, йæ уæлæ пъæлицæйаджы уæлæдарæс куы уа, уæд та йæ алчидæр æмбары, йæ удыхъæд фидар кæй у, цæрджыты сабырдзинадмæ йе ’ххуысы хай кæй хæссы, уый.
Алагираг Тъехты Янæ у пъæлицæйы майор. Мидхъуыддæгты министрады барадхъахъхъæнæг оргæнты куысты размæ уыдис бирæ сывæллæттæн уарзон ахуыргæнæг. Алагиры 3-æм астæуккаг скъолайы сæ зонгæ кодта физикæйы сусæгдзинæдтимæ. Æрыгон чызгæн йæ хъуыдыйы дæр нæ уыдис йæ куысты бынат аивын.
Йæ ныййарджытæ Владимир æмæ Раисæйы бæллиц уыдис, цæмæй сæ чызг равзара дохтыры дæсныйад, дзæбæх кæна адæмы, фæлæ Янæ каст фæцис Цæгат Ирыстоны паддзахадон университеты физикон-математикон факультет æмæ, йæхæдæг цы тыргъты схъомыл ис, уырдæм æрыздæхт ахуыргæнæгæй. Йæ ныййарджыты фæндон – адæмæн лæггад кæнын æххæст кодта, æцæг æндæр хуызы – кæстæрты хуыдта ахуыры бæрзæндтæм. Ацы скъолайы 40 азæй фылдæр райдиан кълæсты ахуыргæнæгæй бакуыста йæ мад. Фыццаг къахдзæфтæ кæнын æнцон нæ вæййы, фæлæ Янæ фæлтæрдджын ахуыргæнджыты амынддзинæдтæ æххæст кæнгæйæ, куыста. Абон йæ раздæры ахуырдзаутæ æхсызгонæй æрымысынц сæ уарзон ахуыргæнæджы.
Уый фæстæ Янæ кусын райдыдта Алагиры районы администрацийы культурæйы хайады Нары филиалы методистæй. Уыцы рæстæг цы зонындзинæдтæ райста, уыдон æй бахъуыдысты йæ дарддæры царды.
Ахуырад, культурæ, уый фæстæ 20 азæй фылдæр – мидхъуыддæгты оргæнты куыст. Уæд ард бахордта, Фыдыбæстæ, закъон æмæ адæмæн иузæрдионæй кæй лæггад кæн-
дзæн, æмæ фæсмойнаг ницæуыл у. Алагиры районы мидхъуыддæгты ми-
нистрады хайады штабы дæсныдæр специалистæн кад ис йе ’мкусджыты ’хсæн. Йæ
куыстыл иузæрдиондзинад, фæлтæрддзинад æвдисæн сты, æрмæстдæр йæ нысанмæ чи тырны, уыдоны къухы кæй бафты æнтыстдзинад
– Фыццаг уыдтæн штабы инженер-программист, уый фæстæ мæ снысан кодтой инспекторæй. Æнæгæдыйæ зæгъдзынæн, фыццаг æнцон нæ уыдис, уставы карз домæнтæм гæсгæ ахастдзинæдтæ, хидарынад, – алцæуыл дæр ахуыр кодтон. Фæлæ мын мæ бинонтæ, ме ’мбæлтты æххуыс ныфс уыдис, – зæгъы Янæ.
Æнæмæнг, хорз зонын хъуыдис барадон, барадон-процессуалон кодекс-
тæ, æмæ уæд пъæлицæйы майор ахуырмæ бацыд Хæххон паддзахадон аграрон университеты юридикон факультетмæ æмæ йæ æнтыстджынæй каст фæцис.
Æрдзæй лæвæрд курдиат ын фадат лæвæртта арæхстджынæй кусынæн, оперативон уавæрæй хатдзæгтæ кæнынæн, алыхуызон ведомствæты бæрæггæнæнтæй раст пайда кæнгæйæ, куысты пълан цæттæ кæнынæн. 2015 азы Янæйы хæслæвæрдтæ фæуæрæхдæр сты, уымæн æмæ сси штабы хистæр инспектор. Уæд йæ пъагæттыл сæрттывтой майоры сыгъзæрин стъалытæ. Милицæйы, ныр та пъæлицæйы службæ хатгай тæссаг вæййы, уæлдайдæр та æхсæнадон фæтк хъахъхъæнгæйæ. Раздæр æмæ ныр дæр Тъехты Янæ зындзинæдтæй нæ тарст.
Иузæрдион службæйы тыххæй Янæйæн раттой бирæ арфæйы фыстæ-
джытæ, кады грамотæтæ, риуылдаргæ нысантæ.
Гæззаты Зæринæ,
Алагиры районы
мидхъуыддæгты
хайады инспектор
