Ацы бонты нæ респуб-ликæмæ кусæг балцы æрцыд Уæрæсейы Федерацийы Центрон æвзарæн къамисы делегаци, йæ сæргъы – сæрдар Эллæ Памфилова, афтæмæй.
Мадзал арæзт цæуы РЦИ-Аланийы Æвзарæн къамисы 30 азы юбилейы кадæн, нæ республикæйы Æвзарæн къамисы хъæппæрисæй, РЦИ-Аланийы Сæргълæу-уæг Сергей Меняйло æмæ Хицауады, Уæрæсейаг æхсæнад «Знание»-йы цæгатирыстойнаг хайад æмæ ПАО «Ростелеком»-ы æххуысæй.
Знон Хицауады хæдзары УФ-йы Центрон æвзарæн къамисы сæрдар Эллæ Памфилова фембæлд нæ республикæйы æппæт районты территориалон æвзарæн къамисты минæвæрттимæ æмæ сын сæ фарстытæн дзуаппытæ лæвæрдта. Æмбырды архайдта нæ республикæйы æвзарæн къамисы сæрдар Моргуаты Жаннæ дæр. Ныхас цыдис канд æвзæрстыты фарстатыл нæ, фæлæ национ æдасдзинад, хæрзхъæд куыст æмæ нырыккон царды уавæртыл дæр. Эллæ Памфилова куыд радзырдта, уымæ гæсгæ Центрон æвзарæн къамис бирæ кусы, хистæр кары æнæкуыстхъом æмæ фæкæсинаг чи у, ахæм адæмы къордтимæ, сæрмагонд æфсæддон операцийы архайджытæ æмæ ног фæзуæтты цæрæг адæмимæ. Уыимæ, æххуысы мадзæлттæ вæййынц алыхуызон, медицинон, социалон æмæ психологон. Алы къабазы дæр кусынц Центрон æвзарæн къамисы организацион системæйы минæвæрттæ æмæ сæ архайды ис æнтыстдзинæдтæ дæр.
– Тынг æхсызгон мын у Цæгат Ирыстоны уæвын. Уæ куысты бæрæггæнæнтæ иннæ регионтæй бæрзонддæр æмвæзадыл лæууынц, æмæ уый у уæ куысты фæрцы. Абон бирæтæ афтæ æнхъæлынц, æмæ нырыккон æхсæнады сæйрагдæр «цифровизаци» æмæ ног технологитæ сты. Æз ацы хъуыдыимæ разы нæ дæн, уымæн æмæ сæйраг сты не ‘взарджытæ, уыимæ, алы динтæ æмæ конфесситыл хæст адæм. Адæм æмæ æвзарæн къамисты æхсæн æнгом æмæ æууæнкджын бастдзинад хъуамæ уа, кæрæдзийы æмбарын æмæ кæрæдзийæн аргъ кæныны миниуджытæ. Æнæ уыдонæй æвзæрстыты куыст æнтыстджын никуы уыдзæн. Уыцы куыст та æнцой кæны æргом æмæ алкæмæндæр бæстон æмбарынгонд хъуыддæгтыл. Не ‘взарджыты фылдæр хай
хистæр кары адæм сты, уыдонæй чидæртæ – æнæбон æмæ фæкæсынхъуаг. Кæй реабилитаци фæхъæуы, кæй – хостæ, æмæ нын алы къордимæ дæр ис бæлвырд архайд. Пандемия куы райдыдта, уæд нæ Къамисы уæнгтæ цыдысты æнæбон карджынтæм æмæ сын кодтой алывæрсыг æххуыс, – загъта Центрон æвзарæн къамисы сæрдар.
Æмбырды архайджытæ ныхас кодтой сæрмагонд æфсæддон операцийы фæмардуæвæг хæстонты бинонтæн æмæ, уæззау цæфтæ чи фæцис, уыцы адæймæгтæн реабилитацион æмæ, медицинон æх-хуысы мадзæлттыл куыд цæуы архайд, уыцы фарстатыл дæр.
Мæздæджы районы фæзуæтты æвзарæн къамисы сæрдар Владимир Гречаный бæстон радзырдта, сæрмагонд æфсæддон операцийы райдайæнæй абонмæ гуманитарон «къанвойтæ» 100 фылдæр кæй арвыстой, уый тыххæй.
– Лæмбынæг кусæм, нæ районæй Украинæйы цы хæстонтæ ис, уыдоны бинонтæн, стæй ног фæзуæтты æвæрæз бинонтæн æххуыс кæныныл кæм хостæй, кæм – хойраджы продукттæй, кæм та – уæлæдарæс æмæ æндæр дзауматæй. Нæ районы карджын сылгоймæгтæ та сын хъарм фæсмын цъындатæ бийынц.
Ног аз æрхæццæ кæны, æмæ та нæхи рæвдз кæнæм ног фæзуæтты цæрæг сывæллæттæн лæвæрттæ балхæнынмæ æмæ адæмæн дæр радон æххуыс бакæнынмæ, – загъта Владимир Гречаный.
Нæ республикæйы районты территориалон æвзарæн къамисты сæрдартæ æмбырды радзырдтой, афæдзы дæргъы сæ куысты цы бантыстис æмæ ма сын цы баззад баххæстгæнинагæй, уыцы фарстаты фæдыл.
Саутæты Тамилæ,
къамтæ систа
Татьянæ Шеходанова
