Дзæуджыхъæуы Намысы аллейы зындгонд командæгæнæг, Фыдыбæстæйы десантон æфсæдты бындурæвæрæг Василий Маргеловы бюсты цур Цæгат Ирыстоны сидтонтæ дæсæй Уæрæсейы Федерацийы Гæрзифтонг тыхты десантон æфсæдты рæнхъытæм ацæуыны размæ бахордтой ард, нæ республикæйы цæрджытæ æмæ не стыр паддзахады раз се ‘фсæддон хæс намысимæ кæй сæххæст кæндзысты, уый тыххæй.
Фæсивæды афæндараст кæнынмæ, ирон æгъдаумæ гæсгæ, æртæ чъириимæ æрбацыдысты нæ республикæйы Десантникты цæдис æмæ Æфсæддон комиссарады минæвæрттæ. Кадджын мадзал бацæттæ кодтой РЦИ-Аланийы Национ хъуыддæгтæ æмæ æддагон ахастдзинæдты министрад, Хæлардзинады республикон хæдзар, Дзæуджыхъæуы æхсæнадон совет, æхсæнадон организаци «Уæрæсейы æфсæддон-историон æхсæнад»-ы регионалон хайад, «Ирон адæмы уæлдæр совет», Афганистаны Ветеранты цæдис æмæ иннæтæ.
Заводы поселочы цæрæг кадджын хистæр Гæгкуты Тæтæрхъаны фырт Юрий, æртæ чъирийы скувгæйæ, арфæ ракодта бæлццæттæн, Стыр Хуыцау æмæ сæ Иры зæдтыл бафæдзæхста, цæмæй се ‘фсæддон хæс кадимæ æххæст кæной, ирон лæджы кад дæлæмæ ма ’руадзой.
Цæгат Ирыстоны Десантникты цæдисы сæрдар Золойты Игорь куыд радзырдта, уымæ гæсгæ ацы аз Уæрæсейы Федерацийы Гæрзифтонг тыхты десантон æфсæдты службæ кæнынмæ Цæгат Ирыстонæй ацыдысты æдæппæтæй 40 æрыгон лæппуйы.
– Мах уырны, Ирыстоны хъæбултæ се ’фсæддон хæс кадимæ кæй сæххæст кæндзысты, уый, – загъта Золойты Игорь.
ХЪОЙБАЙТЫ Галинæ, къам систа
Татьянæ ШЕХОДАНОВА
