Цæгат Ирыстоны Хетæгкаты Къостайы номыл паддзахадон университеты уыд Георгийы дзуары кадæн XIV-æм дунеон форум «Чырыстон дин. Этнос. Культурæ». Презентаци дзы скодтой «Алайнаг дзуæртты фæтк»-æн ирон æвзагмæ тæлмацæй. Ныффыста йæ сылгоймæгты алайнаг моладзандоны минæвар Георгия. Ноджы ма йæ ратæлмац кодта рагон аргъуайнаг-славяйнаг æвзагмæ дæр.
Ацы мадзал бацæттæ кодтой Уырыссаг чырыстон аргъуаны Дзæуджыхъæуы æмæ Бакуйы епархитæ, Белоруссийы чырыстон аргъуан, Цæгат Ирыстоны Хетæгкаты Къос-
тайы номыл æмæ Хуссар Ирыстоны Тыбылты Алыксандры номыл паддзахадон университеттæ, Уæрæсейы наукæты академийы Дзæуджыхъæуы наукон центр, Цæгат Ирыстоны Абайты Васойы номыл гуманитарон æмæ социалон иртасæнты институт, РЦИ-Аланийы Истори æмæ археологийы институт, Цæгат Ирыстоны Национ музей æмæ РЦИ-Аланийы паддзахадон медицинон академи.
Форумы архайдтой паддзахадон æмæ æхсæнадон организациты, республикæйы наукон æмæ сфæлдыстадон интеллигенцийы минæвæрттæ, наукон-иртасæн институттæ, ахуырад æмæ культурæйы уагдæтты разамонджытæ, дины кусджытæ, уæлдæр ахуыргæнæндæтты студенттæ æмæ аспиранттæ æмæ ма ноджы алыхуызон специалисттæ Уæрæсейы алы регионтæ æмæ фæсарæнтæй.
Мадзал иумæ æрбамбырд кодта чырыстон дин æмæ паддзахадон хицаудзинады оргæнты кусджыты æмæ ссис ахсджиаг фæзуат национ культурæ æмæ чырыстон дины ’хсæн бастдзинæдтыл æрныхас кæнынæн. Сбæрæг дзы кодтой, сцалцæг кæнын кæй хъæуы, Аланийы динимæ баст ахæм бæстыхæйттæ, Алани æмæ йæ сыхаг регионты истори астæуккаг æнусты æмæ ныры рæстæг, чырыстон дин Кавказы æмæ йæ ахадындзинад национ культурæйыл, алыхуызон динты ’хсæн ахастдзинæдтæ æмæ æндæр ахсджиаг фарстатæ.
Архайджытæн арфæ ракодта ЦИПУ-йы ректор Огъуаты Алан.
– Форум университеты кæй цæуы, уый ахъаз у гуманитарон диалог фидар кæныны хъуыддагæн, иртасæн куыстыты рæзт æмæ Цæгат Ирыстоны культурон бынтæ ба-
хъахъхъæнынæн. Ныр цыппæрдæсæм хатт æмбырд кæнæм ЮНЕСКО-йы залы, цæмæй равдисæм академион наукæ æмæ чырыстон ахуырады сфæлдыстадон æмархайд. Куыд хъуыды кæнæм, афтæмæй фыццаг хатт Георгийы дзуары дунеон епархиалон форумы ныхас цыд Аланийы саргъуыды 1100-йы юбилей сбæрæг кæныны тыххæй, Цæгат Ирыстоны истори æмæ культурæ бахъахъхъæныныл. Уый ахсджиаг хъуыддаг у алайнаг зæххыл чырыстон дины рагон бындур сног кæнынæн æмæ нырыккон, скифаг æмæ византийаг цивилизациты байзæддаг, алайнаг культурæйы рæзтæн, – фæбæрæг кодта Огъуаты Алан.
Форум цыд дыууæ боны. Æрбацæуыны фадат кæмæн нæ уыд, уыдон та дзы архайдтой видеобастдзинады фæрцы. Фæбæрæг кæнын æмбæлы уый, æмæ уазджытæн фæндаггаг æмæ цæрæнуаты аргъ йæхимæ
райста фысым.
ХЪОЙБАЙТЫ Галинæ
