РЦИ-Аланийы Хицауады Сæрдар Дзанайты Барис архайдта Æхсæнадæмон æлхæнæн сессийы («На высоте!»). Мадзалы сæйраг нысан у Цæгат Ирыстон æмæ Уæрæсейы иннæ регионты уагъд продукцийы экспортон гæнæнтæ фæуæрæхдæр кæнын.
Нæ республикæмæ сессийы архайынмæ æрбацыдысты уæрæсейаг егъаудæр продукциуадзæг куыстуæттæ æмæ ритейл-хызты минæвæрттæ Гуырдзыстонæй, Иранæй, Иугонд Араббаг Эмираттæй, Казахстанæй, Узбекистанæй, Хуссар Ирыстонæй. Йæ куысты ма архайдтой Цæгат Кавказы федералон зылды æххæстгæнæг хицаудзинады оргæнты минæвæрттæ.
Уазджытæн йæ арфæйы дзырды премьер-министр бахахх кодта æмгуыстады ахæм хуызы стыр ахадындзинад æмæ загъта, ирон товаруадзджытæ æхсæнадон базарады æнæмæнг хъуамæ кæй архайой.
– Тынг æхсызгон мын у, бизнес æмæ базарады ахæм ахадгæ, зындгонд специалисттæ махмæ кæй æрæмбырд сты. Мæнмæ гæсгæ, адæмты ‘хсæн бæрнон ныхасæн Ирыстоны зæхх хуыздæр бынат у. Йæ географион æвæрд æмæ иннæ фадæттæм гæсгæ нæ республикæйы ис æнæкæрон экспортон гæнæнтæ, æмæ нæ фæнды уыдонæй спайда кæнын. Махæй сæйраг къæлидор цæуы Фæскавказ æмæ Хæстæг Скæсæнмæ. Фарон, æмткæй райсгæйæ, нæ республикæйы экспорты бæрц, æхцайы фæрæзтæй нымайгæйæ, уыдис 90 милуан доллæрæй фылдæр – ома, продукцийæ – 360 тоннæйы. Уыдонæн сæ фылдæр хай, 80 проценты – агропромышленнон къабазы уагъд продукци, – загъта Хицауады Сæрдар.
Дзанайты Барис куыд фæбæрæг кодта, афтæмæй абон базарады экспортон здæхт рæзы национ проект «Æхсæнадæмон коопераци æмæ экспорт»-ы фæлгæты, æмæ уыцы куысты стыр ахадындзинад ис республикæ æмæ Уæрæсейаг экспортон центры æмгуыстадæн.
– Абон мæ бон фидарæй зæгъын у, федералон æмкусджытимæ нæ бирæазон æнгом архайдæн кæй ис зынгæ æвæрццæг фæстиуджытæ. Æрмæст ивгъуыд аз Уæрæсейаг экспортон центр феххуыс кодта нæ товар уадзджытæй 350-æн. Уый ахадгæ бæрæггæнæн æмæ стыр нымæц у мах субъектæн. Уымæй уæлдай ма, Цæгат Ирыстоны æнтыстджынæй архайы регионалон центр экспортæн æххуысæн. Ам лæггæдтæ исынц чысыл æмæ рæстæмбис амалхъомады субъекттæ. Царды уагъд цæуы регионалон экспортон стандарт, бафидар кодтам экспортон стратеги, æвзæрст æрцыд, чи йæ æххæст кæндзæн, уыцы къорд. Зæгъын мæ фæнды, нæ республикæйы уагъд цæуы, базарады стыр аргъ кæмæн ис, ахæм продукци. Цæмæй раппæлæм, уый нæм ис. Нæ продукци агуырд у нæ бæстæйы иннæ регионты дæр. Æмæ ахсджиаг хъуыддаг у, цæмæй нæ амалхъомтæ пайда кæной, паддзахад æмæ рæзты федералон институттæ цы æххуысады мадзæлттæ дæттынц, уыдонæй, – бахахх кодта Дзанайты Барис.
Мадзалы архайджытæн фадат уыдис сæ фæлтæрддзинадæй кæрæдзийæн фæхай кæнынæн, сæ цæстæнгас зæгъынæн, стæй, цы цæлхдуртæ сæвзæры, уыдон алыг кæнынæн иумæйагæй уынаффæтæ рахæссынæн.
Программæмæ гæсгæ уæрæсейаг æмæ фæсарæйнаг товар уадзджытæн уыдис фембæлдтытæ, сæ фæстиуæгæн та бæлвырд экспортон бадзырдтæ бафыстой.
Æхсæнадæмон æлхæнæн сесси у ахадгæ практикон мадзал РЦИ-Аланийы амалхъомтæн фæсарæйнаг базартæм рацæуынæн æмæ, æнæмæнг, хорзæрдæм фæзындзæн нæ регионы экономикæйыл.
РЦИ-Аланийы
Сæргълæууæг
æмæ Хицауады
пресс-службæ
